Mr. Chickboy

Dear Tita Salie,

Good day. Just call me Ms. Scorpio, 20 years of age, single pa unta apan duna ko’y ka-live in nga 40 years old.

Guwapo kaayo ang akong kapuyo. Puti siya ug sakto sa pamarog. Usahay kun imong pakalitan og tan-aw maa-an pa siya og artista. Datuon man gud siya og kagikan mao nga nindot siya og pamanit.

Hapit na gyud ko mo-surrender kaniya, Tita. Bisan pa man kun guwapo kaayo siya apan mora og dili na gyud nako maaguwanta ang iyang pagka-chickboy. Grabe gyud kay bisan og anaa ko sa iyang duol mokiat gyud ug dili kapugong. Mopilit gyud ang mga mata kun adunay makit-an nga guwapa. Kun dili maagwanta og tan-aw usahay manawag pa siya.

Muondang na gyud unta ko pero sa pagkakaron wala madayon kay nasakit man siya ug ako ang nag-abaga kaniya. Naduol na pud ko sa iyang pamilya ug maglisod ko’g biya kay ako man ang ilang nagustohan nga mobantay kaniya.

Love man pud nako ning tawhana. Apan dili lang gyud nako ma-take ang iyang pagka-chickboy. Palihog pasabta ko, Tita, kun unsay akong buhaton. Daghang salamat sa pagtagad.

* **

Hello, Ms. Scorpio. Usahay makaingon ta nga sakto gyud si Mr. Andrew E. sa iyang kanta nga nag-ingon, “humanap ka ng pangit at ibigin mong tunay” kay gisulti niining maong kanta nga ang pangit wala’y laing mahigugma og ikaw ra gyud. Masulo gyud nimo siya ug wala kay karibal. Kun wala kay karibal siyempre malipayon ka kay panatag ang imong kalooban. Apan kun guwapo o guwapa ang imong pilion dili ka mahimutang kay daghan ang gustong moangkon.

Apan unsaon nato pagtuis sa kamatuoran nga ang tawo magsugod man gyud sa unsay iyang nakit-an. Makagusto ta sa usa katawo tungod sa atong makita kaniya nga mao ang iyang hitsura. Ang nawong man gyud sa tawo ang una natong tan-awon. Sama ra nga ang tawo nga nagtalikod dili panumbalingon, ato gyud kining hulaton nga mopakita sa iyang nawong.

Ms. Socrpio, ayaw pag-antos ug ayaw pagpakahilom. Kinahanglan nga imo siyang sultihan nga wala ka makauyon sa iyang kinaiya nga mao ang pagka-chickboy. Siguro gituyo kining sitwasyon nga kamo rang duha aron inyong makasulti ang usa’g-usa. Apan human niana kun dili siya mag-usab mawagtang na ka niya kay dili na nimo kaya. Matud pa ni Ruffa, “No woman lives a life filled with fear and sorrow. Take courage, break your silence and speak out.” -- Tita Salie