Maunongon Ang Gugma

Gula 53

“Dili ka gyud angay mabalaka. Kun magkainunsa, andam kong mo-testify nga wala ko nimo kidnapa.”

“Mitawag na ko ni Col. Noot. Gipasabot ko siya sa hinungdan ug nasayod na siya nga ania ka pa sa akong possession hangtod karon.”

“Unsa may iyang gikasulti sa pagkasayod niya nga kauban ko nimo karon?”

“Igo lang siyang mipahimangno nako nga dili gayod mohimo’g bisan unsang lakang nga makapasamot sa kabug-at sa akong kaso. Siya lang ang nakasabot sa akong kahimtang. Siya lang ang nakasabot kun nganong mipuga ko gikan sa bilanggoan. Misaad siyang motabang nako kutob sa iyang mahimo.”

“Mao diay nga dako ka kaayo’g pagsalig kaniya tungod kay maayo man diay usab siya kanimo.”

“Oo. Ug dili lang kay ako ray iyang tabangan. Nasayod na usab siya bahin sa imong suliran. Ug mipasalig siya nga tabangan ka sa higayon nga mahiabot na ngadto kaniya ang ebidensiya nga imong nahuptan.”

“Wala gyud diay ko masayop sa akong desisyon pagbalik nganhi sa bukid aron makig-uban nimo. Tungod nimo ingon sa nakabaton ko’g kaisog sa pagpakigbisog sa kinabuhi.” -- Sumpayan pa