Tungod sa gugma, mikuyog si Aldo kang Purita ungo

Wala gyu’y gusto ang mga ginikanan ni Aldo nga sila si Anghel ug Alicia nga si Purita maoy mamahimong hinigugma sa ilang anak ulitawo nga bag-o pang migraduwar sa kursong Information Technology (IT). Kini tungod sa kaliwat sa dalaga nga dugay nang nahibaw-an sa taga dinhi sa Sityo Bukog-Maral nga mga ungo.

Pero alang kang Aldo usa lang kini ka tabitabi nga way sukaranan -- nga matud pa niya maoy pagdaot sa pamilya nila ni Purita.

Gisultihan na siya ni nanay niya Alicia nga si Orang, inahan ni Purita, namugno kuno didto sa isla Kukok nga gigikanan sa ilang kaliwat. Tungod niini, nakiglalis na hinuon si Aldo sa iyang tatay ug nanay.

“Sus, tuo man mo anang istoryaha, uy, Nay, Tay,” ni Aldo pa nga gibati’g kalagot nga ang iyang hinigugma butangan og istorya nga makadaot sa ilang dungog.

“Aw, naa ra nimo, Aldo, basta kay gipahibawo ta lang ka. Kadaghan sa mga dalaga dinhi sa ato nganong kana pa gyud si Purita,” mora’g nagmahay si nang Alicia samtang si noy Anghel naghilomhilom na lang diha sa daplin sa may kilid sa lamesa.

“Dili nato mapugngan si Aldo, uy, Alicia. Sayod ka baya sa gugma. Ang gugma mobarog gyud bisan unsay mahitabo...” kalmado ang tingog ni Anghel nga misabot na lang pud sa gibati sa iyang anak.

Tuod, matag gabii mamisita gyud si Aldo kang Purita didto sa ilang karaang balay nga nahimutang sa may kiliran sa bungtod nga nag-umbaw sa sityo Bukog-Maral.

Unya, samtang sila nag-istoryahay wala kapugngi ni Aldo ang iyang pagbati sa dalaga, iya kining gigakos, gihagkan.

Wala modumili si Purita kay mahal pud niya si Aldo. Dunay karibal si Aldo ug kini mao si Jerry Boy nga anak sa bise-mayor sa ilang lungsod apan wala kini kadama kay si Aldo ang gipili ni Purita.

Guwapa si Purita ug nagtungha siya sa siyudad sa kursong BS Biology. Ug hapit na siya matapos ning maong kurso.

“Hmmm aayaw dihang dapita, Aldo, kay gilok,” miagulo si Purita dihang midapat ang palad ni Aldo sa bilahan sa dalaga. Apan misulbong ang kainit sa ilang mga pagbati ug kay si Purita man lang ang nahabilin sa ilang balay, nahitabo ang dili unta mahitabo -- naangkon ni Aldo ang kaputli sa dalaga.

“Masuko gyud sila si Tatay Benyong ug si nanay Orang ining nahitabo ron nako, Al,” ni Purita pa nga kahilakon. Unya miabot sila si Orang ug Benyong, kalkag kaayo ang ilang mga buhok. Ilang giatubang si Aldo ug namulong si Benyong.

“Imong gipahimuslan ang pagka-babaye sa among anak, Aldo, bugtong namo siyang anak, busa, sukad karon anhi ka na puyo sa among balay...” Ug miduol si Orang kang Aldo ug gitayhopan ang tangkugo niini ug dayon misunod si Benyong, tayhop lang gihapon ang gibuhat niini sa tangkugo ni Aldo.

Pagkataudtaod, nananghid si Aldo nga mouli na. Gikuyogan siya ni Purita sa silong.

“Puwede ka na mang makalupad, Aldo,” ni Purita pa sa bugnaw nga tingog. “Gipatakdan ka na man namo. Sige, ikapakapa ang imong mga kamot...”

“Ungo na ko, Purita, sama ninyo?” nagpakisayod si Aldo kinsa gibati nag kagaan sa lawas ug nanginit ang ulo.

“Oo, pagka karon makauli ka pa, pero, ugma, anhi ka na sa amo puyo, okey?” Mipahiyom si Purita.

Unya, segun sa sugo ni Purita mikapakapa si Aldo sa iyang mga kamot ug wala dangti’g dugay nahimo silang duha nga mga wakwak ug milanog ang ilang tingog, “Wakkkk! Wakkkk, yeeeeee, wakkkkk!”

Ug taliwala sa kangitngit sa kagabhion, nanglupad ang managtrato. Pagka-ingon ugma, nananghid si Aldo sa iyang tatay Anghel ug nanay Alicia nga adto na siya puyo sa ilang Purita, apan matag gabii mobalik ra siya dinhi sa ilang balay.

Kahilakon ang magtiayon sa gipadayag sa ilang anak apan wala sila’y mahimo kay gidala na man ni Aldo ang iyang mga sinina.

Paglabay sa pipila ka semana, matag gabii makadungog sila si Anghel ug Alicia ug tingog sa wakwak. Unya gisangpit sila, Nayyy, Tayyyy, ako ni si Aldo, lilia ko ninyo’g kadiyot diri sa atop aron makita ko ninyooo...! Wakkkk!”

Ug nanganaog sila si Anghel ug Alicia aron motan-aw sa ilang anak nga nahimo nang ungo. (Kataposan)