Balik sa gibiyaan nga kalibotan

Gula 8

Naniltil siya sa kahilom. Ang pitokpitok sa iyang mga mata nagtug-an nga aduna siya’y gihunahuna.

“Pero daghan ang wala malipay sa pag-abot nianang mga sundalo dinhi?” Gitumpag ni Lucia ang paril sa kahilom.

“Ngano man?” gipahinaykan niya ang pagpangusisa sa mga sugilanon nga nahipos sa dughan sa Lumangog samtang siya didto pa sa mangitngit nga uniberso.

“Imbes sila’y magbantay aron magmalinawon kining dapita, sila na hinuon ang nagpasiugda sa kagubot. Kadaghanan kanila mga abusado.”

Nahitalunong si Gener.

Ang hunahuna ni Gener mora’g gimino. Sa iyang handurawan mipaso ang nagkadaiyang mga salida. Sa iyang alipatpat mililas ang wala’y kinutobang panagbangi sa iring ug iro ug ang walay kataposang pagdumot sa bitin ug sa tawo segun sa gipadayag ni Genesis. Ang maong talan-awon nagpasiugda og kabalaka sa iyang kahiladman. Kabalaka nga milubad sa kahisagmuyo nga mihawid sa iyang balatian.

Kritikal na diay kaayo ang kahimtang sa kalinaw ug kahusay sa Lumangog. Kaniadto ang malupigon nga Don Gabaldon ray gikahadlokan sa mga molupyo sa maong dapit. Apan patay na ang Don siya’y nagtapos sa kabanyaga niini. Nagtuo siyang magmalinawon na ang Lumangog human sa kamatayon sa buaya. Apan nasayop siya. May laing dangan nga migimok ug naghasi sa ilang dapit. Sama sa sagbot nga human maibot may mobanos pagturok nga laing sagbot.

“Ang katawhan karon dinhi sa Lumangog sama sa giluto nga bibingka,” giwalis ni Lucia ang tabil sa kahilom. “Kayo sa ibabaw ug kayo sa ilawom. Salbahis kaayo ang mga sundalo. Bisan kinsa na lang ang ilang pasanginlan nga kaabin sa mga walhon. Ang ilang makursonadahan mahiagom sa ilang kabangis.”

May kabidli sa balatian ni Gener ang mihungaw sa pag-aslom sa iyang panagway. Suhi sa iyang balatian ang giasoy sa iyang asawa. Bikil sa iyang kabubut-on ang mga panghitabo sa ilang dapit nga miabot sa iyang kasayoran. -- Sumpayan pa