Maunongon Ang Gugma

Gula 50

Wala na motingog si Danica. Wala na siya ganahing mitubay sa pangomedya ni Jeffrey kay katulgon na siya kaayo.

Didto sa tugkaran sa payag, wala pa matulog si Jeffrey. Nagpasopaso siya sa tugkaran. Matag karon ug unya mohangad siya sa langit nga gidan-agan sa siga sa buwan ug sa mga bituon.

Dihang napul-an nag pasopaso, misandig siya sa usa sa mga haligi sa payag samtang naglingkod sa pagyaka sa yuta. Buot siya nga mahikatulog sa maong kahimtang.

Apan wala siya makatulog. Milab-as sa iyang hunahuna kadtong gisulti ni Danica kaniya kaganina -- nga dili siya angay magpinutong. Iyang nareyalisar karon nga husto ang gipanulti ni Danica.

Nakaamgo siya karon nga ang kamatayon ni Gemma nga iyang hinigugma dili maoy kataposan sa kalibotan alang kaniya.

Nakadayeg siya sa hilom ni Danica. Bisan usa lang kini ka babaye apan nakabaton kini’g talagsaong baroganan ug panud-ong sa kinabuhi. Sakit usab ang nahitabo sa gugma nila ni Danica ug Efren. Apan nakadawat na si Danica sa gidangatan sa hinigugma niini.

Nakapanglingo si Jeffrey samtang nagpalandong niini. Nakaamgo siya nga sama kang Danica, dili siya angay magpaulipon sa iyang kagahapon. -- Sumpayan pa