Pakyas nga Pangandoy

Gula 4

Nagpadayon ang pagbayloay og text messages nila ni Edwin ug Beth.

“Halos di na ko kapugong ganina Beth kay nindot kaayo gakson ang lumoy nimo nga lawas. Mora ko’g mabuang sa kalamiii!!!” text ni Edwin.

Taud-taud, nakadawat si Edwin og reply gikan ni Beth. “Giganahan sab kaayo ko’s imong paggakus nako. Nindot g’yud nga maglingkud ka ug maghigda ko’s imong paa.”

Nakapahiyom si Edwin nga nagbasa sa mga reply ni Beth sa iyang mga messages. Nasuta ni Edwin nga “game” g’yud kaayo kaniya si Beth.

Gihandom ni Edwin nga ang batasan ni Beth karon lahi kaayo dihang giduol niya kini sa wala pa masugdi ang odisyon sa mga drama talent nga wala gani siya tagda sa dalaga.

Misugod pagtagad si Beth kaniya dihang si Edwin gitawag og engineer ni Kuya Edgar nga bisan dili g’yud tinuod nga siya enhinyero. “Maligo usa ko Dwin ha?”

Gisakyan dayon ni Edwin ang sitwasyon. “Sige Beth, kaligo usa aron nga humot kaayo ka kay itupad tika sa akong pagkatulog karong gabii.” “Ay kalami!!” sige ligo ‘sa ko ha? Gikan niadto, kanunay na g’yud sila nga magbayloay og text messages si Edwin ug Beth.

Gidapit ni Edwin si Beth nga magkita sila inigka Domingo, apan mibalibad ang dalaga kay dad-on siya sa iyang mga ginikanan sa ilang dapit sa probinsya. Wala masabti ni Edwin ang iyang gibati kay gimingaw siya sa dalaga.

Milabay ang laing semana. Adlaw’ng Sabado, nakadawat og text message si Edwin gikan ni Beth. “Magkita mi ugma ug ang akong mga amiga sa Fuente Osmeña, kita ta.”

Wala magdugay si Edwin, iya dayong gi-reply. “Sige Beth kay wala g’yud ko malimot sa imong giingon nga magtagbaw ko’g romansa nimo.” Mahinamon nga nagpaabot si Edwin sa reply ni Beth, apan wala na motubag ang dalaga.

Apan naproblema si Edwin. Nahinumdom siya nga inigka-ugma may drama presentation diay sila sa usa ka pista didto sa usa ka baryo sa lungsod sa Borbon.

“Beth pwede postpone nato atong deyt? May drama diay mi ugma ,” giteksan ni Edwin ang hinigugma. Taudtaud, mitingog ang cellphone ni Edwin. “Timbang-timbanga asa ang palabihon nimo, ang drama o ang way tihik-tihik nga romansa.”

Naglibog g’yud si Edwin, apan sa ngadto-ngadto, nahukman g’yud niya nga dili mouban sa ilang drama presentation ug palabihon ang deyt.

Diha sa huna-huna ni Edwin nga angkonon g’yud niya si Beth sa ilang panagkita inigka-ugma. (Sumpayan)