Kadtong tulo ka managhigala

CEBU, Philippines - Tulo ka managhigala nga si Carding, Timo ug Pastor pulos pa batan-on nga gikan pa sa halayong lalawigan sa Mindanao nga nagkasabot nga molangyaw dinhi sa dakbayan sa Sugbo alang sa pagpangita og trabaho.

Nilang tulo si Pastor lamang kanila ang nagkahuman sa ilang pagtungha sa high school ug apan ang duha nga sila si Carding ug Timo igo lang nga nakatongtong sa elementarya apan wala makahuman tungod lagi sa kalisod sa kahimtang sa ilang mga ginikanan.

Gumikan lagi sa kalisod sa ilang kahimtang dili kaayo dakong kantidad nga salapi sanglit nagtuo man sila nga sa ilang paghidangat dinhi sa dakbayan bisan man nga trabaho ang ilang sudlan ug dako ang ilang pagtuo nga dili sila maglisod niini.

Dihang nahidangat na sila dinhi sa dakbayan wala sila’y panimalay nga kasak-an maoy hinungdan nga napugos sila og abang og panimalay nga ilang gitampotampohan.

Nianang pagkasunod adlaw sa ilang paghidangat dinhi sa dakbayan maoy ilang gihimo ang pagsuroy sa pagpangita og trabaho hangtod nga maoy ilang nakita ang usa ka dakong panimalay nga nagbutang sa gawas sa ilang ganghaan og “wanted boy.”

Nagdali sa pagduol ang tulo ka managhigala ug gituktok ang ganghaan ug wala madugay maoy migawas ang usa ka hamtong nga babaye nga maoy tag-iya sa maong panimalay.

Gikahinabi sa tulo ka managhigala ang maong tag-iya nga babaye ug ilang giingnan moaplay og trabaho isip boy niini.

Dugang nga gitutokan sa tag-iya nga babaye ang tulo ka managhigala gikan sa tiil hangtod sa ulo ug unya mipahibalo nga usa lamang iyang dawaton ug kadto lamang naghuman sa pagtungha sa high school. Gitan-aw ni Timo ug Carding si Pastor sanglit mao man kini ang gidawat sa tag-iya kay nilang tulo mao man kini ang nakahuman og tungha sa high school.

“Sugod ugma,” sa babaye pa nga namulong. “Anhi ka na puyo kay libre ka sa pagkaon ug aduna kay kaugalingong lawak nga kapuy-an ug dako ang suweldo nga akong ihatag kanimo ug mag-anam pa kini og omento sa matag bulan kun magpakita ka lang sa imong kakugi sa pagtrabaho.”

Gilingi ni Pastor ang duha niya ka mga kauban nga iyang ikabulag niining higayona sa higayon nga magsugod na siya sa pagtrabaho sa maong panimalay.

“Dili diay mahimo Maam nga kaming tulo maoy imong dawaton og trabaho?” nakapangutana si Pastor ngadto sa maong babaye nga umaabot nga mahimo niyang agalon.

‘No?” sa babaye pa. Usa ra akong gikinahanglan ug ikaw kay morag sa akong tan-aw maoy kasaligan.”

“M-mao ba diay, Maam,” ni Pastor pa nga miagbay sa duha niya ka mga higala. “Kun mao dili na lang ko modayon sa pagtrabaho.”

Tuod man gikan didto mipadayon sila sa pagpangita pa og katrabahoan hangtod nga ilang nasum-okan ang usa ka dapit nga nagkinahanglan og trabahante sa construction worker ug sa silang pag-aplay gidawat gilayon silang tulo sa pagtrabaho niini. (Kataposan)