Kaabtik sa pagpaminaw

Ang kaabtik ni Ramon sa pagpaminaw sa iyang daku ug kaubanan sa trabaho maoy nakapadali sa iyang mga promosyon hangtud nga nahimo siyang tagdumala sa kompaniya sa mina nga iyang gitrabahoan.

Sulod sa iyang opisina nadungog niya ang silbato sa kaudtohon apan wala siya mokihol aron maniudto. Nawad-an siya’g gana nga mokaon. Nagbanusbanos pagpakita sa iyang hunahuna ang panagway ni Padre Damian ug ni Pedro.

Si Padre Damian iyang suod nga higala. Ang ilang panaghigalaay nakaugat sukad pa sa ilang pagkabata. Misalig sila sa usa’g-usa. Magkaklase sila sukad pa sa elementarya hangtud sa high school. Nagkabulag sila diha nga nagkolehiyo na. Mining Engineering ang iyang natapos ug pagka-pari ang kang Damian. Nahimo siyang manedyer sa Atlas Mining Company. Si Damian nahimong Kura Paruko sa Kantabako, Toledo.

Si Pedro; personal body guard kanhi ni Mayor Andan, maoy nagpatay sa amahan ni Layla. Siya mao ang tawo nga girekomendar ni Padre Damian nga pasudlon og trabaho sa ilang minahan. Mao kini ang suliran nga iyang sulbaron karon.

Nakugang si Ramon sa sangpit sa iyang sekretarya: “Sir ania na si Pedro, nga imong gisaara’ng pabalikon inig ala una sa hapon. Ako ba siyang pasudlon sa imong opisina?”

Gipanid-an ni Ramon ang mga lihok ni Pedro dihang iya kining gipasulod sulod sa opisina. Iyang namatikdan nga puno sa kaligdong ang linihokan. “Maayong hapon Sir,” ni Pedro sa matinahurong pangatahuran.

Human palingkora ni Ramon si Pedro, iya dayon kining gipangutana kun unsay kausaban nga nahimo niini sa iyang kinabuhi sulod sa pito ka tuig didto sa Iwahig Penal Colony, Palawan.

“Nakat-onan ko ang pagsalig ug pagtuman sa pulong sa Dios. Gibasolan ko ang pagpatay sa amahan ni Layla, imong asawa. Nahimo ko kadto tungod sa akong katungdanan sa pagdepensa sa kinabuhi ni Mayor Andan, dihang gibanhigan kami sa imong ugangan ug iyang kauban,” mahinulsulong tubag ni Pedro.

“Unsa may imong relasyon ni Padre Damian?”

“Wala! Ako lang siyang gihangyo pamasin nga iya kong matabangan sa akong kalisud pagpangita og trabaho nga kasudlan. Wala’y nidawat sa akong gipangaplayan inigkasayod sa akong pagkaparolado. Ang imong pasaylo ug pagtugot nga ako makasulod og trabaho, maoy katumanan sa akong pangandoy nga mahatagan ko og maayong kaugmaon ang bugtong kong anak aron dili makasunod sa makauulaw kong kaagi,” ni Pedro sa mahangyuong tingog.

Mituhop ang mga pulong ni Pedro sa kinailadman ni Ramon. Makatarunganon ang gihimong rekomendasyon ni Padre Damian kaniya. Iya na lang unyang pasabton si Layla nganong iyang gidawat si Pedro pagkaminero.

Migaan ang pamati ni Ramon nga nahuwasan sa iyang suliran. Ang iyang kaabtik sa pagpaminaw maoy usa ka kinaiyang sulundugon. (Kataposan)