Maunongon Ang Gugma

Gula 47

“Pareho ta,” ni Danica pa. “Kun wa ka pa, ambot kun unsa nay nahitabo nako karon. Tingali, maglatagaw ko nga walay tumong.”

Sayo silang nanihapon. Human sa pangaon, didto na si Jeffrey sa tugkaran sa payag, naglingkod sa nag-igdal nga bato atubangan sa daob. Nagpunay kini’g text sa cellphone niini.

Miduol si Danica sa lalaki.

“Kinsa man kanang imong gi-text?” Usisa sa dalaga.

“Si Col. Vince Noot,” maoy tubag. “Gipahibalo ko siyang daan nga usa niining mga adlawa may ipadala ako kaniyang mga dokumento nga makatabang sa ilang imbestigasyon batok sa Bangkulis Gang.”

“Ihinayon gayod diay nimo ang pagpadala sa mga papeles, journal ug video tape ngadto kaniya?”

“Oo. Kun makabalik ko sa lungsod, ipa-photocopy nako ang mga papeles ug ingon man ang journal. Ang mga photocopies ra niini maoy akong ipadala ngadto ni Col. Noot uban sa video tape. Bahala na silang mag-imbestigar.”

“Maayo unta’g magbunga og maayo ang ilang himuon nga imbestigasyon.” -- Sumpayan pa