Maunongon ang gugma

Gipakita ni Jeffrey ngadto kang Danica ang hulagway ni Gemma Roca nga diha sa wallet niini. Gitutokan pag-ayo ni Danica ang hulagway sa girlfriend ni Jeffrey. Matahom tuod kini. Mora’g si Drew Barrymore sa Hollywood.

“Guwapa gyud diay ang imong girlfriend,” nakaingon si Danica. “Mao diay nga na-in love ka’g maayo niya.”

“Siya na tingali ang una ug kataposan kong gugma,” ni Jeffrey.

“Ayaw pagsulti’g human, uy,” ni Danica. “Ako gani nga babaye, wala man nako tak-opi ang akong kasingkasing. Gisakitan ko sa kamatayon ni Efren. Apan akong nareyalisar nga my heart must go on bisan wala na si Efren.”

Wala motingog si Jeffrey.

“Nasayod kong sakit gayod alang kanimo ang nahitabo sa imong hinigugma,” matud ni Danica. “Gawas nga gipatay siya, gipanamastamasan pa gayod ang iyang pagkababaye. Pero inayanaya lang ang imong gibati. Sa kadugayan makadawat ka ra sa kamatuoran.”

“Salamat sa imong tambag,” ni Jeffrey pa. “Tungod nimo, na-feel nako nga wala ko mag-inusara sa kalibotan.” -- Sumpayan pa