Kalag sa nalumos nga bata

Nakadungog na si Jovelito Jaime nga reporter sa DYKC nga taga barangay Tingob sa dakbayan sa Mandaue sa mga estorya labot sa kalag sa tawo nga mobalik human sa pipila ka adlaw nga pagkamatay niini.

Wala motuo si Jovelito niini sanglit gipasikad man niya ang iyang prinsipyo sa kinabuhi nga “see is to believe” nga nagpasabot nga motuo lamang siya sa iyang makita.

Alas 12 sa udto nga nag-inusarang naglingkod sa lantay nilang kawayan sa gawas sa iyang payag ug iyang nabati ang singgit og tabang gikan sa mga bata nga naligo sa Busay.

Ang Busay usa ka lawom nga bahin sa Butuanon River nga mitadlas sa barangay Tingob sa dakbayan sa Mandaue ug pipila lamang ka metros ang gilay-on sa nahimutangan usab sa iyang payag.

‘Tabangg!!” nagkanayon ang singgit sa mga bata. “Nalumos among kaubann!!”

Nahipugwat si Jovelito sa iyang pag-inusara dihang miokiok sa iyang dalunggan ang tagming nga singgit og pakitabang sa mga bata gikan sa Busay.

Mikaratil sa pagdagan si Jovelito ngadto sa nahimutangan sa mga bata sa tuyo nga pagluwas sa bata nga nalumos ug dili ang pagkuha og balita isip reporter sa radyo DYKC.

Bisan kun nagkabugtobugto ang gininhawa ni Jovelito sa iyang pagdagan paingon sa maong sapa wala kini niya panumbalinga sanglit sa iyang paghidangat sa pangpang dali man siya nga miambak sa pagsawom ngadto sa sapa. Nahidangat si Jovelito sa halawom nga bahin sa iyang pagsawom sa tubig ug nakita na niya ang bata ug gisulayan unta niya sa paggunit apan daw nawad-an siya sa ginhawa maoy hinungdan nga mibalik siya sa pagtunga sa ibabaw nga bahin sa tubig alang sa pagginhawa.

Nahidangat ang uban nilang silingan ug miapil usab sa pagsawom sa sapa ug ilang nakuha ang bata ug gidala ngadto sa sakyanan ug gihatod sa tambalanan apan gideklarar kining dead on arrival.

Daghang gabii nga walay kinatulgan si Jovelito nga naghunahuna sa bata nga napakyas siya sa pagluwas sa pagkalumos sa sapa.

Hangtod nga usa ka gabii niana wala lamang niya damha nga nagpakita kaniya ang bata nga daw masuk-anon kining nagtan-aw kaniya.

Nagtuo si Jovelito nga ang iyang kapakyas sa pagluwas sa maong bata maoy hinungdan sa kasuko niini ngadto kaniya nga maoy hinungdan nga nalumos ug nakaingon sa hinanaling kamatayon niini.

Nangayo og pasaylo si Jovelito sa kalag sa bata nga nagpakita kaniya ug sukad niadto wala na kini mopakita pa kaniya.

Karon nabug-os ang pagtuo ni Jovelito nga may kalag gayod diay ang tawo. (Katapusan)