Balay sa mangtas duol ra sa kapilya

Si Esoy ang nakapalit sa lote nga tupad sa kapilya. Dili taga dinhi sa sityo Bukag si Esoy apan dugay na siyang nagpuyo didto sa lungsod. May puwesto man god ang iyang asawa sa merkado maong diha lang pod sila magbalaybalay apan mamauli sila inig ka gabii.

Ang tabitabi mao nga si Esoy dunay sigbin. Ang nakakita mao si Onyot ang kargador ni Benay nga may tindahan usab sa bugas sa may atbang sa merkado. Matud pang Onyot nga iya gyong nakita si Esoy nga nagpakaon sa iyang mga sigbin.

“Kanding seguro tong imong nakita, Bay Onyot, uy,” ni Hesus pa nga wala dayon motuo sa gitaho kaniya ni Onyot.

“Kanding god, kaila ko’g kanding, uy, Bay Hesus. Naa diay kanding nga gamay ang mga tiil dapit sa unahan. Sigbin gyod to kay kalit man lang milukso ang usa ug unya nahanaw pagkalit.”

“Mao ba, aw, kun mao na, basin diay og tinuod nang imong pagduda, Bay Onyot.”

“Unsay basin god. Tinuod gyod ni kay dili bakakon ning mga mata. Wala pa god ni madaot ang akong mga mata. Diha ra god ko sa kilid sa ilang puwesto didto sa merkado,” nangugat si Onyot unya mibiya dayon. Ang ilang balay tua sa may sityo Bukag ug taga didto gyod siya.

Nianang pagka sunod buwan may nagbalay sa may lote nga di layo sa kapilya. Ug dihang gipangutana ni Onyot kun kinsay tag-iya sa maong tigbayon, mitubag ang panday nga iya ni Esoy.

“Ha, si Esoy diay ang tag-iya niining gitukod nga balay ug unya sila puyo dinhi?” Nakalad-ok og laway si Onyot nga nakugang sa iyang nahibaw-an nga sila si Esoy ug ang iyang pamilya anhi na mamuyo sa ilang sityo ug anha pa gyod duol sa kapilya. Ang balay nilang Onyot naa sa may ilawom sa kasagingan atbang sa talyer ni Guido ang mekaniko.

“Bay Hesus, nia na man gyod puyo kana sila si Esoy, imo na unyang matino ang tinuod, nga duna sila’y sigbin ug mga kaliwat sila’g mga mangtas. Mao diay nga maayo sila’g pagkabutang, kay basta duna kay buhing sigbin, moasenso gyod ang imong pagpuyo, ug dali rang moursa ang negosyo,” iyang gipasabot si Hesus nga naminaw.

Tuod, pagka human sa balay namalhin dayon sila si Esoy ug ang iyang duha ka anak ug asawa dinhi sa balay nga duol sa kapilya. Ug sama sa giingon ni Onyot, nakita pod ni Hesus ang duha ka sigbin nga naglakawlakaw sa may tugkaran sa balay nilang Esoy. Sigbin! ni Hesus pa sa hilom dayong lakaw ug kusog kaayo pahilayo sa may dakong kahoy duol sa kapilya. Karon, iya na gyong natino nga wala magbinuang og sulti si Onyot kaniya.

Unya usa ka gabii dihang mipauli si Onyot may nakita siya sa sulod sa kapilya nga morag dunay naglingkod sa may lingkoranan ug sa iyang paglili maoy mibantang sa iyang panan-aw si Esoy nga naghapuhap sa duha niini ka sigbin, unya dali kaayo kining nakamatikod sa pag-abot ni Onyot, ug matud pa niini, “Bay, Bay Onyot, sulod ngari sa kapilya kay may ipakita ko nimo....”

Misulod si Onyot nga morag nag-ukon-ukon. Unya milingkod siya sa tupad nga lingkoranan sa kapilya.

“Mao ni ang akong mga binuhi, Bay. Mga sigbin. Dili lang kay kini ra sila, daghan kaayo ni sila. Ako silang tawgon, ha,”ni Esoy pa nga morag dunay gipitohan. Taudtaod nangabot ang kinse ka buok mga sigbin. “O, kakita ka nila, Bay Onyot, daghan kaayo ni sila, unsa man gusto ka? Gusto ka ba kay hatagan tika...” Wala motubag si Onyot. Dali siyang mitindog ug mibiya sa kapilya. Sa didto na siya sa may unahan og gamay may nabati siyang tingog sa wakwak nga morag nagtubagtubag. Ug didto kini sa tungod sa balay nilang Esoy duol sa kapilya. “Wakkkkk!! Wakkkkk! Wakkkk!”

Misutoy si Onyot og dagan sa kahadlok. (Katapusan)