Balik sa gibiyaan nga kalibotan

CEBU, Philippines -  Ang pagdapat sa dunot nga gomang sapatos nga nag-amping sa luspad nga mga tiil nakamugnag hinay’ng agbon sa abog sa dalan. Daw napukaw ang nahinanok nga yuta sa hinagtok sa mga tunob nga gisugat sa nanghuyatid nga kabuntagon. Mihinay paglakang ang bukogon nga mga tiil. Ang dapit nga nahitukmaan buot himuong bantawan sa tag-iya sa mga tunob nga mipaso.

Apan sa unahan nahilom ang mga tunob. Nalansang ang mga tiil sa gibarogan nga yuta. Ang tag-iya sa niwang nga mga tiil miliraw sa palibot. Dihay kahinangop nga milumpat sa iyang kahiladman nga gisaphig sa misuyla niyang pahiyom. Gibusog niya ang iyang mga mata sa mga talan-awon nga gipasundayag sa iyang atubangan. Dugay nang gihikaw sa iyang panan-aw ang maong salida.

Mao na gayud kini, tuaw nga giugom sa iyang kahiladman. Ania na gayod siya sa dapit nga giiliw sa iyang dughan. Ang dapit nga iyang gitalikdan sulod sa taas nga kutay sa panahon. Sa laing higayon milaa’g ang iyang mga mata. Gipahimuslan ang naangkong kagawasan. Gisubli niyag sud-ong ang katahom sa kinaiyahan. Walay pagkapuol nga gitupsan sa iyang tinan-awan ang kalikopan. Ug nasuta niya ang katahom sa kagawasan.

Gikan pa siya sa kalibotan nga nahimong lubnganan sa mga buhi. Dapit nga gilubloban sa mga sungayan. Dapit diin nag-imbudo ang mga demonyo. Ang maong dapit mas mangitngit kay sa langob sa taluktokan sa bukid sa Kaandis. Wala siya’y tinguha nga mopuyo sa maong kalibutan. Apan nahiadto siya sa maong dapit gumikan sa tawag sa kahigayonan. Gitukmod siya sa kasal-anan. -- Sumpayan pa