Maunongon ang gugma

CEBU, Philippines -  Samtang nahinanok pa si Jeffrey, midalikyat si Danica sa tubod ug naligo. Nagdala na siyang daan og ilisan -- ang sinina nga gipalit ni Jeffrey alang kaniya. Bugnaw kaayo ang tubig sa tinubdan nga iyang gikaligoan. Nagtagbaw gayod siya sa iyang kaugalingon sa pagkaligo.

Nagmata na si Jeffrey sa pagbalik ni Danica sa payag. Ingon kini sa nakalitan pagkakita kaniya nga presko kaayo kay bag-ong nahuman og kaligo.

“O, nganong misiga man kanang mga mata mo?” ni Danica.

“Wa man,” ni Jeffrey nga mapahiyomon. “Angayan ka man diay kaayo sa sinina nga akong gipalit. Misamot ka’g kaguwapa.”

“Mao ba?” ni Danica pa. “Ingon ka nga dili ka maantigong mamili og sapot sa babaye. Nganong maayo man lagi nimong pagkapili kining imong gipalit para nako? Sibo kaayo ni nako.”

“Ako lang gibanabana,” matud ni Jeffrey. “Sa ako gong tan-aw, pupareho ra mo’g lawas si Gemma.”

“M-mao ba?” “Oo. Mas habog ka lang tingali kay kaniya.”

“Guwapa gyud tingali kadto si Gemma, no?”

“Para nako, guwapa si Gemma. Aaw, ambot lang kaha para sa uban. Ingon ra ba nila, beauty is in the eyes of the beholder.” -- Sumpayan