Ignorante ug taga-bukid

Pagkahuma’g pangihi ni Claro sa CR sa Foodcourt sa Gaisano-Ayala, nakahunahuna siya sa pagpanghunaw. Kay alas dose na sa udto. Tingpaniudto na. Ug nagsabot sila ni Dina iyang kapikas nga anhi sila dinhi maniudto. Si Dina ang nikuyog ni Fiona ilang apo nga nagduwa sa playground, duwaanan sa mga bata, nga naa ra duol sa Foodcourt sa ikaunom nga andana sa Gaisano-Ayala. Tagsa ra ni siya manghunaw kun mangihi lang. Apan karon, preparasyon sa paniudto, manghunaw lang gyud siya.

Nilakang si Claro padulong sa lababo sa CR nga distansiya lag tulo ka metros gikan sa ihianan. Dihang hapit na siya moabot sa labado, kalit may nasal-ut nga batan-ong lalaki. Nauna ang lalaki og abot tungod sa lababo. Niurong nalang si Claro sa iyang lakang aron di niya hidasmagan ang bukobuko sa batan-on.

Unya nahibulong siya nga nagtan-aw sa batan-on. Wa gyud kasugod og panghunaw ang batan-on. Nangita’g lisoanan sa gripo. Way makitang lisoanan. Morag tumoy sa takuri tan-awon ang gripo. Wa niagas. Gilubag sa batan-on ang gripo. Di matarog. Giduot-duot niya. Gahi! Way tubig niagas. Gihapakhapak niya. Wa gihapon niagas. Hapit usa ka minutos niyang lasolaso sa gripo. Wa gyud ka agas. Nalarawan sa hitsura sa batan-on ang kahibulong ug kalagot.

“Out of order man tingale ning gripoha,” tuaw ni Claro sa hilom. Nagbarog lang gihapon siya luyo sa batan-on. Naghulat lang siya kun makahuma’g panghunaw ang batan-on. Aron mobanos siya. Gipanid-an niya ang batan-on aron makat-on sab siya’g unsaon pagpaagas ang gripo.

Retirado nga magtutudlo sa saring publiko sila si Claro ug Dina. Pensiyonado na sila. Ilang duha ka mga anak nga puro lalaki, mga propesyonal na. Si Fiona ilang paboritong apo nga nagtungha sa Kinder 2. Dad-on-dad-on nila si Fiona sa ilang mga lakaw. Kay naa ipon pa man nila ang ginikanan sa bata nga si Kenneth, ilang kinamaguwang ang anak ug si Lorelie ilang binalaye. Nangaplay pa sila’g loan sa Pag-ibig aron makapalit og house and lot.

Ganihang mga alas diyes sa buntag nibayad si Dina sa MCWD sa ilang konsumo sa tubig sa niaging bulan. Si Claro ang drayber sa ilang serbis nga pinalit ni Hector ilang kamanghurang anak nga usa ka Architect ug ulitawo pa. Igo gyung alas onse ang takna pag-abot nila sa Gaisano-Ayala. Makaduwa pa si Fiona balig usa ka oras sa Playground.

Samtang tua sila sa playground, si Claro nagpalabay sa oras sa baligyaanan og bargain books sa ikatulong andana sa bilding. Kining iyang lingaw, ginganlan niyag book hunting. Wa siya kahibawo unsang libroha iyang gipangita. Apan kun makit-an na niya, anha pa niya hibaw-i kun gusto ba niyang paliton. Ang iyang hilig basahon mga true crime stories ug kanang may kalambigitan sa psychology ug psychotherapy.

“Guba man ning gripoha!” masuk-anong pulong sa batan-on. Nagpamente. Atol gyud nga may nisulod nga janitress nga nisugod og mop sa sawog sa CR. Niyahat ang batan-ong babaye apan wa niurong sa iyang gibuhat.

“Unsay guba?! Ignoranteng dako! Taga-bukid! Ipatungod lang imong kamot sa tumoy sa gripo! Moagas ra nag iya!” banghag sa janitress.

Gituman sa batan-ong lalaki ang daw mando/kasaba sa janitress. Niagas ang gripo. Nakapanghunaw ang lalaki. Nanglipaghong sa kaulaw. Nagdaling nigawas sa CR.

Kalma nga nibanos si Claro sa lababo. Ug nasayod na siya kun unsaon pagpaagas ang gripo. Kay kun wa pay nisal-ut nga niuna niya, molutaw unta gihapon siya nga ignorante ug taga-bukid. High tech god kaayo ang maong gripo. (Katapusan)