Maunongon Ang Gugma

Gula 42

Nagpaabot si Danica nga mosulod si Jeffrey sa payag. Apan nagpabilin si Jeffrey didto sa tugkaran sa payag. Hangtod nga giganoy siya sa katulogon.

Igo na lang gayod alang sa pamahaw ang nahibiling mga delata ug tinapay nga dala ni Jeffrey.

“Molugsong ko sa patag,” nananghid si Jeffrey human sa ilang pamahaw. “Mamalit ko sa atong mga kinahanglanon samtang anhi pa kita dinhi.”

“Mokuyog ko,” ni Danica.

“Ayaw na lang.”

“Imo kong ibilin dinhi? Mahadlok ko. Awaaw kaayo ning dapita.”

“Wa kay angay kahadlokan dinhi. Mas delikado kun mokuyog ka nako ngadto sa patag. Tingali’g makit-an ka ni Randy Unson ug sa iyang mga sakop. Nakaseguro kong gipangita ka na nila karon.”

“Unya, ikaw? Gipangita ka na man sab sa kapolisan?”

“Ayaw kabalaka nako. Ako nay mahibawo sa akong kaugalingon. Suheto ko sa dagan sa hunahuna sa mga polis tungod kay polis usab ako kaniadto.”

Wala na motingog si Danica. Wala na siya mamugos nga mokuyog sa lalaki. -- Sumpayan pa