Dili ka anak

Dear Tita Salie,

Maayong adlaw ug kumosta? Tawga lang ko og Len taga Aloguinsan, Cebu. Minyo apan wala pa tugahi og anak.

Pito na mi ka tuig nga minyo sa akong iresponsable nga bana. Apan ako lang kini nga giantos unsaon ni-enter man ko niining kinabuhing minyo. Kining akong bana kanunay magdali. Bisan nagkaon mi gusto niya nga dali ra mi mahuman. Kun duna mi lakaw gusto nga dali ra mi manguli. Tanan na lang nga among buhaton permi siyang nagdali. Dili gyod ko ganahan niining kinaiyaha.

Unya kun masakit ko dili siya moatiman nako. Magsalig lang siya sa akong mga ginikanan. Dili gyod siya masaligan. Ako ra bang nasayran nga nagpakapon siya mao diay nga wala gyod mi makabaton og anak. Matud sa akong mga higala nga puyde ra ko magpaanak sa lain kay kuno dili man kahatag og anak ang akong bana. Ug matud nila nga dili kuno makagukod ang akong bana kun ako kining buhaton ang magpaanak sa lain kay duna siya’y diperensya.

Tinuod ba kining ilang gisulti, Tita? Gusto lang ko nga makasiguro sa akong buhaton. Palihog pasabta ko. Daghang salamat. -- Len

* * *

Maayong adlaw Len, kun ako ang anaa sa imong dapit karon, mao lang gihapon ang akong bation, kay pulos frustrations ang imong nasugatan sa kinabuhing minyo. Dili lalim ang imong nahiagoman karon. Kinahanglan ang taas-taas nga pasensya ang pagpailob. Apan ang pangutana kun hangtod asa kutob ang imong pagpailob.

Dili maayo nga magpaanak ka sa lain samtang kamo pa sa imong bana, kay kasado kamong duha. Ayaw pagtuo sa mga sultisulti sa imong mga higala kay dili kana mao ang insakto. Kun makig-relasyon ug magpanaak ka sa laing lalaki puyde ka niyang kasohan ug ipabilanggo. Busa, ayaw pagtoo niana.

Imo usa siyang bulagan sa legal nga pamaagi una nimo mabuhat ang imong plano. Kun irresponsable gyod ang imong bana ug wala ka na mahigugma kaniya imo siyang pakig-estoryahan kun aduna pa ba siya’y pagpakabana kanimo nga iyang asawa. Kay kun wala na inyong sabotan ang mas maayo ninyong buhaton aron kamo magmalipayon. Kay para nako, dili usab maayo nga magpabilin nianang maong kaminyoon.

Ayaw gyod buhata nga magpaanak ka sa lain samtang nagtipon pa kamong duha kay tingali unya og mapatyan ka sa imong bana. -- Tita Salie