Lover Boy - Gula 3

Migunit si Gelyn sa bukton ni Boy dihang misulod na sila sa balay aron pagsusi kun unsa kadtong kasaba nga nakapahadlok kaayo sa dalaga kaganina.

Gipasiga ni Gelyn ang suga sa sala diin didto nagikan ang kasaba kaganina. Apan nahasinggit si Gelyn dihang milukso ang dakung iring. Napagakus si Gelyn kang Boy tungod sa kahadlok ug abtik usab kaayo siya nga gigakus sa polis.

“Mao ba kana ang imong kwarto Gelyn?” nakapangutana si Boy tungod kay nakita nila nga diha pa ang dugo nga nagbanaw dapit sa pultahan. Nangurog ang kalawasan ni Gelyn tungod sa kahadlok. “Tana, manggawas na kita dinhi Boy,” ni Gelyn pa nga mihana pagbitad sa bukton sa polis.

“Wala ka na ba’y buot kuhaon gikan sa imong kwarto?” giingnan ni Boy si Gelyn. Diha pa niya mahibaw-i nga tapot-lawas ra diay ang iyang sapot kay ang uban anaa sulod sa kwarto. “Husto tuod, magkuha unta ko og sinena apan mahadlok na ko mosulod.”

Gi-am-aman ni Boy si Gelyn ug hangtud nga misugot kini nga buksan nila ang lawak. Gipasiga dayon ni Boy ang suga sa kwarto ug misamot kahadlok si Gelyn nga nakakita sa mas daghan pang mga dugo nga hapit na mabagtok sa sawog ug diha sa kama.

Gihakop lang ni Gelyn ang iyang mga sapot nga gibitay sulod sa cabinet samtang mitabang usab pagdala si Boy sa ubang kagamitan sa dalaga. “Ang imong kwarta, basin og wala kay magamit nga panggasto,” gipahinumduman ni Boy si Gelyn.

Miuna si Gelyn nga migawas sa kwarto apan naghuwat kini sa gawas sa pultahan. “Ayaw na lang pagnga ang suga sa kwarto Boy ug binlan usab nato og usa ka suga nga magsiga dinhi sa sala,” matud ni Gelyn.

Didto sila mipaingon sa kwarto sa katabang. “Dinhi na lang ko matulog,” giingnan ni Gelyn si Boy. “Unya dili ka mahadlok nga biyaan nako?,” abtik nga tubag ni Boy.

“Pwede ba’g ubanan ko nimo dinhi karong gabhiona?” gisukna ni Gelyn si Boy. “Sure, no problem, but magtupad g’yud ta’g higda kay usa ra man ka katre ang diha sa kwarto.”

Wala makatingog si Gelyn ug nagkatinutokay silang duha. “Maligo unta ko Boy pero mahadlok ko kay tua sa gawas ang kaligoan. Pwede magpauban ko nimo?” ni Gelyn pa. Naghinam-hinam kaayo si Boy sa sunod nga panghitabo. (Sumpayan)