Lover Boy

Gula 2

Miabut sila si Boy ug si Orchids sa balay sa dalaga diin didto mahitabo ang krimen. Nakita ni Orchids ang iyang katabang nga diha na sa gawas sa balay tupad sa duha ka bag. “Day, maayo kay miabot ka na... mopahawa na ko dinhi Day, mahadlok na ko nga mopuyo dinhi sa balay.”

Nakalitan si Orchids sa hukom sa iyang katabang nga mopahawa na sa iyang trabaho. “Sori g’yud kaayo Day apan dili na ko mopadayon pag-estar dinhi. May giandam na ko nga pagkaon nimo Day anaa sa lamesa,” matud sa katabang.

Wala magdugay ang katabang human makapananghid kang Orchids, mibiya kini nga nagbitbit sa duha ka bag. “Kun mao kini, ikaw na lang ang mahabilin dinhi sa balay Gelyn?” matud sa polis nga si Boy.

“Nagplano ko nga ibaligya na lang kining balaya kay mahadlok na usab ko nga mopuyo dinhi tungod sa nahitabo. Sulod usa Boy, may pagkaon na man kuno nga giandam ang akong katabang nga mibiya na kanako,” giingnan ni Gelyn si Boy.

May pagkaon na tuod nga naluto ang katabang. Nagdungan pagpangaon sila si Gelyn ug Boy. “Unsay imong plano, anhi ka matulog unyang gabii? Kun mahadlok ka, mahimong ubanan ko ikaw dinhi unya kay off duty na man ko karong hapon,” matud ni Boy.

Gikalipay kaayo ni Gelyn kon Orchids ang tanyag sa higala niyang polis. “Sige Boy, ubani usa ko dinhi mentras wala pa ko makakita’g laing kapuy-an.” Human sa ilang pagpangaon, nagbayloay sila og numero sa cellphone. Taud-taud, mibalik si Boy sa CCPO kay ang iyang pananghid sa iyang hepe nga igo ra siyang maghatud ni Gelyn.

Wala na mosulod si Orchids sa iyang lawak. Nahadlok siya nga mosulod nga walay kauban sa pagtoo nga anaa pa ang espirito nila ni Ralph ug Ronald. Didto ra siya mipahuway sa kwarto sa ilang katabang, hangtud nga siya nakatulog.

Kalit lang nga nahigmata si Orchids kay dunay mikagay didto sa sala. Mikuba pag-ayo ang iyang dughan ug wala siya migawas sa kwarto aron pagsusi.

Nahukman niya nga tawgon si Boy. “Palihug aria dayon ko sa balay, nahadlok kaayo ko kay dunay mikagay sa sala,” nagkurog ang tingog ni Orchids. “Anaa na ko, karon dayon,” matud ni Boy. Wala tuod madugay, nakadungog si Gelyn og tingog sa motor nga mihunong sa atubangan sa balay.

Gitawgan niya si Boy. “Ikaw na ba kana Boy ang miabot? Matud ni Gelyn nga migawas dayon sa kwarto ug midagan paingon sa gawas. Diritso siya nga migunit sa bukton sa polis nga daw nagkurog. (Sumpayan)