Gula 6
Nakapanglad-ok sa laway si Ralph nga nagsud-ong ni Orchids. Gisunod ni Orchids ang paghukas sa iyang gisul-ob nga pantalon. Daw mikusog ang pitik sa kasing-kasing ni Ralph.
Wala siya makaagwanta, gibuksan niya ang pultahan aron mogawas. Nagtoo siya nga naanad na tingali si Orchids sa batasan nga maghukas ug mag-ilis sa sapot bisan og may tawo nga magtan-aw kaniya.
Apan sa dayon nang gawas ni Ralph sa pultahan, gigunitan ang iyang kamot ni Orchids. Napalingi siya ug nakita niya nga ang nipis na lang nga panapton nga nagtabon sa labing pribadong parte sa lawas maoy nahabilin ni Orchids.
Misamot pagkusog ang pinitik sa kasing-kasing ni Ralph. “Gelyn, unsay buot mo nga ipasabot?”
Hinay nga mihigda si Gelyn kon Orchids ngadto sa kama. Gipasiga niya ang lamp shade dapit sa ulohan sa kama. “Pagnga ang suga sa kwarto ug paghukas na.”
Nasabtan na g’yud ni Ralph kun unsay gusto ni Orchids nga mahitabo. Wala maglangan si Ralph. Giukoban niya ang mga ngabil sa dalaga. Taud-taud nga nag-ukobay ang ilang mga ngabil. Gihukas ni Ralph ang iyang sapot. Misunod ang kamingaw sa tibuok lawak.
Paglabay sa usa ka oras, paraygon na kaayo si Orchids ngadto kang Ralph. “Basin og mahibaw-an ni Ronald ang atong gihimo. Daghan ra ba kaayo na siya og mga alalay nga masuko nga maniid nato,” mabalak-on si Orchids.
“Dili kita magpasabot sa atong mga lihok, ilabi na kun tua kita sa gawas aron walay problema kun may makakita nato,” dali nga tubag ni Ralph. “Anhi na ko matulog pirmi sa imong kwarto ha panahon sa gabii.”
Nasubli pa ang ilang pagparayganay. “Sige balik na sa imong kwarto, apan tan-awon usa nako kun wala pa ba magmata ang katabang. Paryente ra ba usab kana siya ni Ronald,” ni Orchids pa.
Gigunitan ni Orchids ang gunitanan sa pultahan sa kwarto sa katabang aron nga dili maabli kun mogawas kini sa kwarto. Gisinyasan dayon niya si Ralph nga mogawas na sa balay.
Alas singko na sa kaadlawon. Mibalik si Orchids sa iyang lawak. Wala dayon siya makatulog. Gihanduraw niya ang nahitabo nila ni Ralph. Nakapahiyom si Orchids kay natagbaw siya sa ilang kumbati.
Ambongan nga pagka lalaki si Ralph mao nga iyang kagustohan ang nahitabo kanilang duha. (Sumpayan)