Ang sinugdanan anaa sa kataposan

Gula 91

Kanunay mo-text si Cody kang Colleen. Mga sweet messages ang kanunay nga ipadala niini kaniya. Mga mensahe nga maka in love. Pero wala gayod niya tubaga ang tanang mga mensahe ni Cody. Naglikay siya nga madala sa tam-is nga mga pulong niini. Sa text ra ba, makapabor og maayo ang mga bakakon ug malimbongon. Sa text, naa ang tanang binuang ug bulada.

Aron hingpit nang makalikay kang Cody, nakahukom si Colleen nga makigminyo kang Brendan. Samtang nagtungha pa siya, magpa-secret marriage una sila. Uso na man karon ang SM. Daghan na man gani sa iyang mga klasmit ang naghimo niini. Kadtong mga managhigugmaay nga gustong makaseguro nga sila gayod ang magkadayon ang sagad sa naghimo niini.

Kini usab ang nahunahunaang paagi ni Colleen. Magpa-SM sila si Brendan. Kanang legal nga paagi. Unya na sila magpakasal sa simbahan kun makatapos na siya sa iyang pagtuon. Total, dili pa man sila magtipon si Brendan. Basta ba lang may dokumento nang makamatuod nga magtiayon na sila. Aron dili na magsamok si Cody sa ilang relasyon.

Nagtuo si Colleen nga makakat-on ra gayod siya sa paghigugma kang Brendan kun iya na unya kining bana. Siyaro na man sab kun hangtod na lang gayod sa hangtod nga magpabiling tig-a ang iyang kasingkasing ngadto kang Brendan. Buhaton na gayod niya ang tanan aron mahigugma kang Brendan kun bana na niya kini. -- Sumpayan pa