Maunongon Ang Gugma

Gula 36

Bisan gani siya mismo nakalitan sa nakab-ot niyang desisyon. Tinuod nga wala siya’y laing kapaingnan nga dili siya matultolan ni Randy. May mga kabanay siya nga atua sa Leyte ug Bohol nga puyde niyang kadangpan. Apan segurado nga matultolan ra gihapon siya ni Randy ug sa iyang mga ginikanan kun adto siya modangop kanila.

Maong nakahukom siyang makig-uban kang Jeffrey dinhi sa lasang. Wala na siya’y laing nahunahunaang paagi aron makalikay kang Randy. Nagpasalamat siya sa kahigayonan nga gikahimamat niya si Jeffrey bisan sa dili maayong paagi-- hostage taking! Usa ka strange circumstance ang nagtakdo sa ilang duha ka dalan.

Hulog ba sa langit si Jeffrey alang kaniya? Kanay dili niya matubag. Apan masaligon siya sa kaisog ni Jeffrey. Nasayod siyang dili siya niini pasagdan. Nakaseguro siyang dili siya makuha ni Randy sa dakong kasayon kun kauban niya si Jeffrey.

Hapon nang nahibalik si Jeffrey sa payag.

“Unsa man nang dala nimo?” Nahinulong si Danica sa gibitbit sa lalaki.

“Manok ihalas,” tubag ni Jeffrey. “Ako na lang giasal daan didto duol sa may tampi sa tubod.”

“May tubod diay dinhi?”

“Oo. Dili kaayo layo gikan dinhi sa payag. Nagtuo ko nga ang maong tinubdan maoy gigamit sa mga tawo nga nagpuyo niining maong payag kaniadto. Nalibon na usab ang palibot niini, maila nga dugay nang wala mataak ug tawo.” -- Sumpayan pa