Ang sinugdanan anaa sa kataposan

Gula 90

Gihukman ni Colleen nga likayan sa hingpit si Cody. Nagdako ang iyang katahap nga may daotang tuyo ang ulitawo kaniya. Gusto lang siyang panimaslan sa ulitawo gumikan sa gibuhat sa iyang ate Alexa ngadto niini.

Iyang gitimbangtimbang nga dili tinuod nga nahigugma si Cody kaniya. Kun tinuod pa, nganong karon man lang kini nangulitawo kaniya. Angay unta nga kaniadto pa kining mipadayag sa gugma niini kaniya. Dili unta angay niining pangulitawhan ang iyang ate Alexa. Siya unta ang angay nga gipanguyaban niini.

Karon nga nabugto ang relasyon nila ni Cody ug Alexa, kalit lang diay nga nahigugma ang ulitawo kaniya? Imposible! Lisod kaayong tuohan! Mao nga nagduda gayod siya nga may itom nga laraw si Cody. Natahap siya nga gusto lang manimalos si Cody kang Alexa ug siya ang himuong instrumento sa pagpanimalos niini ngadto sa iyang maguwang.

Mao nga bisan si Cody ang matuod nga gipitik sa iyang kasingkasing, ilikay niya ang iyang kaugalingon gikan sa maong lalaki. Dili siya buot nga ang paghatag niya’g kagawasan sa maong gugma maoy maggahas og dalan aron makabaton og katumanan ang kasilag ug panimalos ni Cody ngadto sa iyang Ate Alexa.

Wala siya malimot sa gisulti ni Cody usa niana ka higayon nga wala kini magbaton og kasilag sa iyang maguwang. Apan inanay siyang nakaamgo karon nga lisod diay kaayong tuohan ang maong mga pulong ni Cody. Nasayod siya nga gisakitan pag-ayo si Cody sa gibuhat sa iyang ate Alexa mao nga dako ang posibilidad nga hilom kining nagbaton og kasilag ngadto sa iyang maguwang. -- Sumpayan pa