Mora'g gikumot

Dear Tita Salie,

Hello Tita ug kumosta? Tawga lang ko sa pangalan nga Cris, single pa. Ang akong problema kabahin sa akong lovelife nga maoy kanunay mokumot sa akong kasing-kasing.

Aduna koy uyab nga usa na mi katuig. We really love each other, Tita. Ug tungod kay love gyod kaayo nako siya akong gihatag kaniya ang tanan nakong gugma. Wala na koy ikahatag sa lain pa tungod kay anaa na kaniya ang tanan, ako na nga gitugyan.

Apan dihay usa ka higayon nga wala nako paabota nga mahitabo. Ako siyang nakit-an nga dunay laing ka-mate, Tita. Ako gyod mismo ang nakakita kanilang duha. Mora gyod og gikumot ang akong dughan sa sobrang sakit, Tita. Tungod sa akong kasuko ako siyang gi-give-up, gibulagan ko siya, kay dili ko gusto nga aduna siyay lain kay love man unta kaayo nako siya.

Apan karon nagsige siya og text nako ug nagsige og pangayo og chance. Naglibog ko karon, Tita. What will I do in my situation? Palihog pasabta ko. Thank you very much and more power. -- Cris

* * *

Dear Cris

Tinuod gyod nga masakitan gyod ta kun atong masaksihan nga ang tawo nga atong gihigugma nakig-estorya, nakighagwa o nakig loving-loving ngadto sa laing binuhat. Mora og lami kaayo nga ibugno og tawo tungod sa kasakit nga atong masinati. Ilabi na kun kita nagbinuotan kay atong giampingan ang relasyon nga unta dili maguba.

Nakasulay ako niini sa unang panahon sa akong kabatan-on. Dihang akong nabalitaan nga ang akong hinigugma nagpadala og sulat ngadto sa akong amiga didto sa among probinsiya. Naglagot ko og maayo sa akong uyab ug mora og naguba ang among gugma ug nahanaw ang akong pagsalig kaniya. Tungod sa akong kalagot nakahukom ko nga dili na magpakita pa kaniya.

Walay makapugos kanimo nga balikan siya ug wala usay makapugos kanimo nga kalimtan na lang siya. Pangutan-a ang imong kaugalingon nga human sa imong pagsuka kaniya, tungod sa iyang binuang, kaya pa ba nimo siyang dawaton? Makahatag ka pa ba pagbalik sa imong nabungkag nga pagsalig ngadto kaniya. Bisan pa man kun may gugma ka pa kaniya apan wala ka nay pagsalig ayaw usa siya dawata kay sa dili madugay magsige ra gihapon mo og away. Unya na lang siya dawata pagbalik kun andam ka na usab nga mosalig kaniya nga dili ka na magduda nga magbinuang pa siya. -- Tita Salie