Ang sinugdanan anaa sa kataposan

Gula 89

Hangtod sa pagpauli ni Colleen sa ilang pinuy-anan sa Banawa, ang gipanagsultihan nila ni Cody maoy kanunay niyang gihunahuna. Nahisama kini og compact disc nga gi-reply sa iyang kaisipan.

Sa tinud-anay lang, wala pa gani mangulitawo si Cody kaniya apan naka-first base na kining daan kaniya. Kaniadto ra siyang may gitagoan nga pagbati sa maong lalaki. Giluom niya ang maong pagbati sulod sa dugay’ng panahon.

Apan lahi ang sa kaniadto kay sa karon. Komplikado na ang iyang sitwasyon karon. Dili mahimong bugtoon niya sa dakong kasayon ang relasyon nila ni Brendan. Bisan wala siya mahigugma sa maong lalaki apan bation gihapon niya ang kaluoy ngadto niini. Nakaseguro siyang sakitan gayod kini sa higayon nga iya kining buwagan.

Gawas pa, nagduhaduha siya sa kamatinud-anon sa tuyo ni Cody kaniya. Nahinumdom siya sa pahimangno kaniadto sa iyang ate Alexa nga magbantay siya kang Cody kay tingali’g siya ang panimaslan niini?

Dili kaha posibleng mahitabo ang gikabalak-an sa iyang ate Alexa? Nga sa higayon nga makuha na ni Cody ang iyang pasalig, pahilakon lang siya niini?

Misaad si Cody kaniadto nga dili magsamok sa relasyon nila ni Brendan. Apan nganong karon ingon sa nagtinguha man si Cody sa pagguba sa maong relasyon? Dili kaha panglawgaw ang gibuhat ni Cody? Misamot ang kabalaka ni Colleen nga may nagpahiping daotang katuyoan sa pagpangulitawo ni Cody kaniya. -- Sumpayan pa