Nagtibi si Glen samtang nagpadagan sa bisiklita nga hinulaman niya sa iyang higala nga si Hildo. Wa gani siya masayod sa iyang padulngan. Basta lang makapadagan siya. Ug mahilayo sa ilang barongbarong nga gipuy-an nila ni mama Ingrid niya nga dakong masakiton. Ilang barongbarong nahimutang sa libunon nga dapit sa Cabancalan. Duha ka semana na iyang mama nga naglubog sa banig. Nahurot na ang tinigum niyang salapi sa tambal. Wa pa gyud siya maayo.
Sa maayo pag lawas, naninda siya’g pagkaon kilid sa dalang M.L. Quezon Avenue di layo sa National Power Corporation. Otso anyos si Glen nga bugtong anak. Wa pa siya kamatngon og buot nga nibiya iyang amahan nga si Jake ug nikuyog og laing babaye. Mao ni sugilon ni mama niya. Maong sila rang duha ang nagpuyo sa ilang barongbarong.
“Dong Glen, pangitag kuwarta Dong. Basin pa may makaon ta rong gabii” hangyo ni mama Ingrid niya sa wa pa siya nibiya sa ilaha. Nagkaputolputol ang tingog sa inahan nga wa pa gyud nahuwasi sa hilanat ug ubo.
Nitindak og kusog si Glen subay sa lapad nga dalang Quezon Avenue padulong sa merkado sa Nasipit. Wa siya’y tataw nga padulngan kay wa man siya’y nahunahunaan kun asa siya mangita’g kuwarta. Basta may lapad nga dalan sigi lang siya’g sikad ning kilumkilom. Unya nadagsa siya sa Commercial Complex nga nahimutangan sa Rose Pharmacy ug ubang mga establisamento nga nag-abang sa maong complex.
Tungod sa botika may naka-parking nga puti nga Toyota FX. May tawo nagkamangkamang tungod sa toong ligid sa atras. Naplat ang maong ligid. Nagsige og bomba ang tawo sa jack. Nakita ni Glen nga duha ka jack ang nagtukod sa sakyanan. Usa dapit sa atras. Ug laing usa dapit sa atubangan nga kasamtangang maoy gibomba sa tawo nga singkwentahon nag pangidaron. Wa gyud niisa ang sakyanan. Gipaningot ang tawo.
“Huwaman tika’g jack nga kusgan sir,” ni Glen ngadto sa tawo dungan ang pagpahunong sa bisiklita tungod sa luyo sa sakyanan.
“Sigi Dong kay suholan tika. Nay kining jack sa atras, ako ni. 5 tonner kono. Apan di kadaug. Nanghuwam kos talyer sa atbang. Akong gibomba, di gihapon kaisa sa sakyanan,” sa tawo nga nagdapowas sa singot sa agtang ug nawong pinaagi sa luyo sa iyang walang palad.
“Adto kos may vulcanizing sa unahan” ni Glen. “Puwede adto ka’s Petron. May gasoline boy kong kaila diha. Si June Patindol. Ingna mohuwam ko. Dad-a lang akong ngan. Ingna si Doctor Entice” sa tawo.
“Sige, sir, adtoon nako” ni Glen nga madasigon.
Pagkataudtaod nahibalik si Glen nga naglakaw na lang. Nagbitbit og jack nga gamay apan lig-on og hitsura.
“Nakahuwam kas Petron?” sa tawo.
“Wa, sir. Nag-leave kono si Patindol. Diha ko kahuwam sa vulcanizing shop atbang sa Petron” ni Glen.
“O nganong naglakaw na man lang ka?’ sa tawo.
“Gipabilin ang bisiklita sa tag-iya sa vulcanizing” ni Glen. Nakatawa ang tawo.
Gipahimutang dayon ni Glen ang jack niyang dala. Siya na ang nibomba. Naisa na ang sakyanan. Igong nikawan ang ligid nga naplat. Ug nailisan sa tawo ang plat nga ligid sa reserba.
“Bida, Dong. Kun wa pa ka niabot, basi’g mabuntagan pa ko dinhi, di gyud ko kailis sa ligid,” sa tawo. Mapahiyomon na. Nanarapo sa iyang singot ginamit na iyang panyo.
“Iuli na nako ring jack sa vulcanizing, sir” ni Glen.
“Ayaw una. Unaha rig uli ang dako nga jack hinuwaman nako sa talyer sa atbang. Dako, abi nakog makadaug og dekarga. Apan bisag FX lang di kadaug” sa tawo.
Gikuha ni Glen ang dakong jack. Giuli sa talyer sa atbang.
Giuli sab ni Glen ang jack sa vulcanizing shop. Ug nakuha na niya ang bisiklita nga hinuwaman. Dako niyang pasalamat sa tag-iya sa jack. Unya nibalik siya sa nag-parking nga FX.
“Adto na ko, sir” ni Glen.
“Dong, imo ni o” sa tawo. Nagtunol ni Glen og tulo ka papel de banko. Tagmanggatos. Niginhawa’g lawom si Glen sa kalipay. Kahilakon siya sa kalipay.
“Salamat kaayo, sir” ni Glen.
“O wa man lagi nimo hiposa imong jack” ni Glen nga nagduko og tan-aw sa jack nga bag-o pag hitsura nga nagbarog sa semento.
“Imo na na. Ako nang primyo nimo’g apil. Kay mopalit kog laing jack” sa tawo. Sangko sa langit ang pasalamat ni Glen.
Nibalik siya sa vulcanizing. Gipakita niya ang jack nga hinatag.
“Oy kabag-o pa god ining imong jack” sa tag-iya sa vulcanizing.
“Palita Noy” ni Glen.
“Presyohan ko nag tres sentos” sa tawo.
“Sige” ni Glen. Ug niuli si Glen nga nagdala nag pagkaon nilang mama niya ug tambal.
“Nag-ingon baya gyud ang Diyos nga lihok tawo kay tabangan ko ikaw” ni mama Ingrid niya nga naggakos sa anak sa tumang kalipay. (Katapusan)