Ang sinugdanan anaa sa kataposan - Gula 87

“Misamot lagi ka’g kaguwapa,” ni Cody nga nagpahiyom.

“Makamao ka na man diay nga mobulatik ron?” Sikmat ni Colleen.

“Tinuod bitaw. Kanang imong beauty maoy di gyud nako makalimtan. That’s why I’m here to pursue my feelings to you.”

“U-unsay buot mong ipasabot?”

“I love you, Colleen ug nasayod ka na niana, dili ba?”

“Kanus-a lang nimo masayri nga gimahal ko nimo?” “Sukad sa gihimo mong pagpangayog pasaylo alang sa gihimo sa imong maguwang kanako. Akong nasuta nga buotan ka gyud nga pagka-babaye ug angay higugmaon. Gipaningkamotan ko ang pagpatay niining pagbatia tungod kay nasayod kong dili angay. Apan maglisod gayod ako sa paghikalimot kanimo.”

Wala motingog si Colleen. Gipamalandongan niya ang gisulti ni Cody.

“Tinud-anay ning akong tuyo nimo, Colleen,” ni Cody pa. “When I say it, I mean it.”

“Pero di ba misaad ka man nga di ka magsamok sa relasyon namo ni Brendan?” Misukmat si Colleen.

“Tinuod kana. Pero niining higayona bakwion ko ang akong gipanumpaan nga saad. Tungod kay gimahal ko ikaw, Colleen. Di ko mabuhi kun wa ka.”

“Pero si Brendan?”

“Naa ra nimo ang tanan. Kun si Brendan gyud ang imong pilion wa ko’y mahimo. Apan ikasakit ko gyud kun pakyason mo ang akong gugma.” -- Sumpayan pa