Duha ka Gaba sa asawa

Tungod sa pagka himabaye ni Rafael, naungkag gyod ang ilang pagpuyo. Walay adlaw nga di maghilak si Elena nga iyang asawa. Dunay mga higayon nga dili mopauli si Rafael sa ilang pinuy-anan gikan sa trabaho kay adto kini maglublob sa iyang kirida.

Kun pangutan-on ni Elena si Rafael sa iyang lakaw, diin kini gikan ug nganong wa mahiuli, singhagan lang siya ug makatilaw pa gani sa mga kamot niini.

Igo lang sa pagpatulo si Elena sa iyang mga luha. Mora’g dili siya asawa nga gikuhaan sa katungod sa pagsubay sa mga lakaw sa iyang bana. Ug bisan pa sa mga santako ug tamparos nga iyang hiaguman sa mga kamot ni Rafael, gimahal gihapon niya kini bisag nakamatikod na siya nga morag gimad-an na kini sa pagmahal kaniya.

Sa bag-o pa silang nagtipon sa salag sa kaminyoon, pinangga kaayo siya ni Rafael. Hupong sa pagmahal, tambayayong sa lawasnon nga pakigsalo. Gani sayo kining mopauli gikan sa trabaho. Kadtong tanan gipakaingon ni Elena og langit.

Apan naunsa ba, nga kalit man lang nausab si Rafael? Mao diay kay nagbisyo kini. Natental sa laing babaye tungod sa di mapugngan nga tentasyon.

Ug kay lagi, nabuang pag-ayo si Rafael sa babaye, iyang gipaligas si Elena. Iyang gihinginlan sa ilang pinuy-anan, gipalayas ug ang pobre intawon nanaog nga mora’g nagbawon og usa ka kalibotang kahiubos.

“Dayon ngari ... ayaw gani pag-ukon-ukon,” gibitad ni Rafael si Katrina sa pagsulod sa balay.

“Raf, wa ka ba maluoy sa imong asawa?” gipaliraw ni Katrina ang iyang mga mata sa sulod sa balay.

“Ang kaluoy ug paghigugma ko sa akong asawa, ako nang gikatugyan kanimo,” matud ni Rafael dungan sa pag-ukob sa mga ngabil ni Katrina. Nagpungasi ang mga halok ni Rafael, mora bag gipanuwayan, morag torong kabaw nga naglumpayat sa kahangol.

“Husto na uy, di man ta ka ginhawa nimo,” milugnot si Katrina sa kusganong mga bukton ni Rafael nga nagbilikis kaniya.

“Katrina, makabuang ang imong katahom.” Ug giukoban na usab ni Rafael ang mga ngabil sa babaye nangaligid sila sa kama.

Sa pagpanglabay sa mga adlaw may namatikdan si Rafael nga mora’g nag-anam ka hanap ang iyang panan-aw. Sa sinugdan gibalewala lang niya kay gipakaingon niya og wala lay kabilinggan. Apan sa adlaw-adlaw niyang kalihokan nag-anam gyod pag-awop ang iyang panan-aw.

Miresulta na ang kanunay niyang paghilam-os gikan sa trabaho nasubhan ang kainit. Gitambagan siya niadto ni Katrina apan wala siya maminaw. Karon hingpit na gyod nga dili siya makakita.

Nagsukarap si Rafael sa kangitngit. Magpanawag siya kang Katrina og pakitabang apan sikmatan siya ni Katrina.

“Ngano ba, gibitin ka?”

“Katrina, kalain god nimo’g tinubagan,” ni Rafael pa nga nagpangapkap sa hawanan.

“Kay ngano, nahimangod ka sa akong gisulti?”

“Wa ko magdahom nga ingon ka diay niana.”

“Karon nga inutil ka na Rafael, biyaan ko na ikaw,” pintok nga pulong ni Katrina. “Sapi ray akong giapas kanimo.”

“Salbahis ka Katrina ... mananap ka...” Ug mihilak si Rafael.

“Tawga ang imong asawa kay kaniya kinasal ka. Adios, Rafael.”

Walay nahimo si Rafael gawas sa pagdawat sa kamatuoran. Mibulto karon sa iyang galamhan ang dakong pagbasol. Ang kabuotan ni Elena nga nagtamod sa kabalaanon sa kaminyoon iyang gipanamastamasan. Karon pa siya moila sa iyang sayop. Gaba kaha kini sa iyang asawa? Kun gaba gani, maoy pagaingnon, ang gaba dili gyod magsaba. (Katapusan)