Ang sinugdanan anaa sa kataposan

Gula 87

“Ok,” mubong reply ni Colleen.

Naabtan ni Colleen si Cody nga nag-inom og ice tea nga giparesan og siomai sa iyang pagsulod sa outlet sa Chowking sa may eskina sa dalan Colon ug Osmeña Boulevard. Mikidhat kini pagkakita kaniya.

“Unsay gusto mong orderon?” Nangutana dayon si Cody dihang nakalingkod na siya sa atbang niini.

“Siopao lang ug halohalo,” wala’y pag-ukon-ukon nga tubag ni Colleen. Daklit niyang gitutokan si Cody. Midaot og diyotay ang panglawas sa ulitawo apan misamot ang kaambongan niini sa iyang panan-aw.

Mitindog si Cody ug miduol sa counter. Sulod lang sa pipila ka gutlo, nahibalik kini sa iyang nahimutangan nga nagsapwang na sa tray nga gipatongan sa iyang gi-order.

“Dugaydugay na kong wa makabalita bahin nimo,” nagkanayon si Colleen samtang nagpadayon sa pagkaon. “Abi ko’g mi-abroad ka na.”

“Abroad gud tawon,” mipahiyom si Cody. “Wa ko mangambisyon niana.”

“Diin ka man diay?”

“Dinhi ra gud sa ato. Nangita’g dapit nga makabaton og peace of mind.”

Wala motingog si Colleen. Misantop sa iyang hunahuna nga tug-anan si Cody mahitungod sa nahitabo sa iyang ate Alexa. Apan nausab ang iyang hukom kay iyang nareyalisar nga dili kinahanglang masayod si Cody mahitungod sa maong butang. Basin kun biay-biayon unya hinuon ni Cody ang iyang maguwang ug makaingon nga gigabaan kun masayod kini sa gidangatan sa iyang ate Alexa. -- Sumpayan pa