Hired killer

Bwa-ha-ha-ha!!! Milanog ang demonyohanong bahakhak ni Don Procopio sud sa iyang harianong panimalay nga nag-umbaw sa hataas nga bungtod ning lawom nga kagabhion. Tungod kini sa iyang nabalitaan sa radyo nga patay na si Don Celastico, ang iyang kasosyo sa negosyo sa usa ka sikat nga kan-anan sa ilang dapit.

Matud sa balita, nakit-an ang patay’ng lawas ni Don Celastico sud sa kwarto sa usa ka bar nga naligo sa kaugalingong dugo. Kun unsay motibo sa pagpatay, tukionon pa kini sa mga tinugyanan sa balaod.

“Nailhan si Don Celastico sa iyang pagkabuotan, pagkamanggiluy-on, pagkamanggihatagon ug walay mga kaaway. Mao gani’g bisan giduso na siya sa iyang mga kasilinganan pagdagan isip usa ka mayor. Wala gyud kini niya buhata. Aron di gyud siya kita’g kontra.

Kinsa ba gud ang magtoo nga siya si Don Procopio ang nagpapatay sa iyang suod nga amigo ug kasosyo sa negosyo nga si Don Celastico. Nga sud sa lima ka tuig gipapalambo sa ilang kan-anan.

Wa gyud sila kasugat og kakulian o bisan magkalalis man lang og diyotay. Makita gayud sa mga katawhan ang ilang kasuod. Kun atong matawag og “Same feather flock together.” Mitingsi si Don Procopio nga naghunahuna niini.

“Sorry bay, kay bright lang ko’g kabuang kay kanimo,” ni Don Procopio nga mipabuhot sa aso sa gium-om niyang hunsoy.

Kagahapon pa lang sa kaadlawon nasudla’g bakukang ang ulo ni Don Procopio nga basi’g may dautan kining buhaton si Don Celastico alang kaniya nga sama sa iyang nahunahunaan. Ilabi na nga nagkasikat ug mikusog na ilang negosyo. Busa milihok dayon siya pagpangita og usa ka hired killer nga maoy mokutlo sa kinabuhi ni Don Celastico sa hapsay nga paagi. Ug karon, nagmalampuson gayud siya.

“Congrat’s Don Procopio!” ni Don Procopio nga nagpasopaso sa dakong hawanan sa iyang sala. Ug gipahalipayan ang kaugalingon pinaagi sa pagkuha sa tinipigan niyang mahalon nga ilimnon.

Moyarok na unta sa bino si Don Procopio. Apan may kasikas siyang nabatyagan sa iyang luyo. Nakita niya sa iyang atubangan ang anino sa tawo nga naa sa iyang likod. Gilingi kini ni Don Procopio.

“I-ikaw...?’ Hikalitan si Don Procopio sa iyang nakita. Usa ka tawo nga nagsul-ob og lubos itom nga kalo, jacket ug maong pants. Itom usab ang gwantis niini nga nagkupot sa may silencer nga pusil. Sa laktud mao kini ang killer nga iyang gisugo aron patyon si Don Celastico.

“Nganong nia ka? Di ba gibayran na tika!” may kalibog ang tingog ni Don Procopio.

“Ania ako aron pagtuman sa sugo nga patyon ko ikaw, Don Procopio.” Kalmado nga pulong sa killer.

“K-kinsay nagsugo nimo?”

“Si Don Celastico.”

“Unsang pagkahitaboa?”

“Nauna ka la’g lima ka oras ni Don Celastico sa pakigkita nako, adtong adlawa. Pareho kamong dauta’g hunahuna. Busa pangandam na sa imong kamatayon.” Tsug! tsug! tsug! Tulo ka hilom nga buto sa pistola ang gibuhian sa hired killer ug didto mitama ang mga bala sa agtang, dughan ug liog ni Don Procopio. Nabulagta kini sa salog. Gasiga ang mata. Naligo sa kaugalingong dugo. (Katapusan)