Lingaw-lingaw lang

Human sa pipila ka semana nga namingaw ang usa ka bahin sa dalan Sanciangko tungod sa pagsirado sa Sanciangko’s Wildflower, karong gabhiona misadya pagbalik ang maong dapit kay gibuksan ang Wild Orchids Bar diha gihapon sa dapit nga nahimutangan sa Wildflower kaniadto.

 Si Gelyn nga migamit sa angga nga Orchids maoy miabang sa pwesto kay dunay nakatug-an kaniya nga misikat kaniadto ang Sanciangko’s Wildflower sa mao nga lugar sa Sanciangko.

Ang gikarelasyon ni Gelyn nga si Ronald, kinsa usa ka drug pusher, atua pa sa Cebu City jail apan wala kini hunong sa paghatag kaniya og kwarta nga gipaagi sa iyang mga kontak.

May “go signal” kang Ronald ang pag-abli ni Orchids og bar ingon man ang additional attraction nga si Orchids g’yud mismo maoy mosayaw kun hapit na manira ang bar sa alas tres sa kaadlawon.

Sa unang gabii sa pagbukas sa bar, si Gelyn mismo ang miabi-abi sa mga customers ug diha siya magtindog dapit sa pultahan nga angayan kaayo sa gisul-ob niya nga short pants nga red, ug mubo nga T-shirt nga makita ang iyang hawakan.

Gituyo niya nga Wild Orchids ang gamiton nga “business name” sa iyang bar kay ang pamaagi niya pagsayaw daw sa tinuod nga nag-wild ang usa ka dancer ug sigurado siya nga makadani kini’g daghang customer.

Dali ra kaayo nga napuno ang mga lamesa sa Wild Orchids Bar ilabi na nga pulos mga batan-on ug gwapa ang mga gi-hire ni Orchids nga mga entertainers.

Nabantayan ni Orchids nga dunay mga nanag-inom nga gikan sa ubang imnanan namalhin sa iyang bar. Wala g’yud siya masayop nga buksan ang bar sa adlaw’ng Sabado, ilabi na nga sweldo niadtong petsa 15.

Samtang nagbarug si Orchids duol sa counter, giduol siya sa floor manager. “Gelyn, naay news reporter nga gustong makig-estorya nimo,” matud sa floor manager nga may kaubang lalaki nga nagpahiyom.

“Aw mao ni ang tag-iya sa bar? Si Philipp ko, reporter sa City Hall. Biliba nako uy, unang gabii pa gani puno-puno man dayon sa customer. Gwapa man gud diay ang tag-iya,” gibulatikan ni Philipp si Gelyn.

“Thank you Philipp. Just call me Orchids. Sige drink and enjoy pero wala ka nay kalingkoran kay ukopado ang tanang lamesa,” ni Orchids pa. “Walay problema, may kauban ko nga reporter sa City Hall nga moapas karon… sila si Ely Bolonos ug Chris Ligan.” (Sumpayan)