Ang sinugdanan anaa sa kataposan

Gula 85

“Wa pay klaro kun kanus-a mobalik dinhi si ate Alexa,” ni Colleen.

“Gipakaingon ko ba’g sila na gyud si Alexa ug Cody ang magkadayon,” ni Yana pa. Nagkabuwag diay sila?”

“Tungod ni Jack. Nadani si Ate sa tam-is nga mga pasalig ni Jack. Wala siya magdahom nga igo lang siyang pahimuslan niini. Nagtuo siya nga pakaslan gayod siya ni Jack ug magpuyo siya sa kaharuhay uban niini.”

“Dili baya daotan kun mangandoy ta nga makapanghantok, nga makabana’g adunahan. Pero angay gyud sab laging mag-amping. Si Alexa nakatumong lang gyud og lalaking way dugokan.”

Mipataliwala kanila ang kahilom.

“Anugon,” namulong si Yana pagkilab sa pipila ka daklit.

“Unsay anugon?” Wala makaagpas si Colleen sa buot ipasabot ni Yana.

“Mianhi ko aron pagdapit ninyong duha ni Alexa.”

“Pagdapit sa unsa?”

“Kaslon na kami si Jarren sa sunod buwan.”

“Diay ba?” Tuaw ni Colleen nga karon pa masayod nga nagdako gayod diay ang relasyon nila ni Yana ug Jarren nga nagsugod lang sa ilang panaghimamat usa niana ka higayon nga nangaligo sila sa dagat.

“Ikaw na lay akong dapiton kay wa na man si Alexa,” ni Yana. -- Sumpayan pa