Baho sa buwad nga nangalisngaw sa balay ni Inse Porlang

Wa baya masayop si Inse Porlang, nga aron dili siya laayan nga mag-inusara sa ilang balay, ilabi na nga taudtaod na gayod siya nga nabiyuda ... nag-negosyo na lang og buwad?’ maoy una kong gisulti kang Nanay Repsalyang nga niadtong tungora nagkadusingot intawon og tinayhop sa gitak-ang niyang tinughong alang sa among pamahaw.

Nagpataka ka na man lang og yawit ... Niyong? Basin ang imong lawas nga tagsa ka buwan nga maligo sa sapa ning atong balangay sa Bugho ang nanimahong buwad?” ingon sa gisapot ang akong inahan ilabi na nga nakaalinggat kanako nga kanunay na lang mopalta sa akong pag-eskuyla sa grade one, kay magpunay na man lang ako og panirador og gansiyang.

“Yuna pa diay ... Niyong, asa man diay karon nimo ihigot ang turo tang kabaw? Imo na ba lang nga gibiyaan nga wa makasibsib og tarong sa sagbot nga kugon?”

Dili ikalimod ... nga nagparehas na lang kining akong inahan nga taudtaod nang nabiyuda kang anhing Tatay Elyong kay nasungayan og unay sa among kabaw sa panahon nga iya na unta nga palunangon. Unsaon, misuki man nga giahat ni anhing Tatay og guroy dala sa may lunangan, nga wa niya hibaw-i nga nanguwag diay?

Adlaw kadto nga Sabado. Mihapit ako sa balay ni Inse Porlang, pagmatuod kun unsa katinuod ang akong napanimahoan nga kabaho sa buwad. Dili man god motuo ang akong inahan nga nagnegosyo og buwad ang iyang manghod nga biyuda kang anhing Tiyo Bartolo?

Gihigot ko lang ang among kabaw sa may punoan sa kamansilis nga ako na usab nga itugway. Kuwang man gud sa pagtuo ang akong inahan bahin sa akong nasingohan nga kabaho sa buwad?

“Unsa man nga milagroha Niyong nga nasaag ka man og hapit dinhi sa balay?” gisugat ako og sukot ni Inse Porlang.

Inse na man lang god ang akong tahod sukad ako makatimaan og buot nga unta Tiya may insakto nga itawag ko kaniya ilabi na nga kamanghoran nilang Nanay Repsalyang?

“Gusto lang unta ako moinom og tubig Inse Porlang, kay hilabihang uhawa?” diskarte kong pamakak sa akong iyaan.

Wa pa gani ako makasulod sa may kusina ni Inse Porlang, nalipong na ako sa kabaho nga nasingo pagkasawod sa akong ilong?

“Nganong nanampong ka sa imong ilong Niyong? Aduna bay talagsaong baho nga imong nasimhotan?” nagpusotpusot ang pangutana ni Inse Porlang.

“Mao ray ato ... Inse Porlang, nagnegosyo ka og pamaligya og buwad?” dihay kamaikagon sa akong pangutana.

Nahitiurok sa makadiyot ang akong iyaan. Ug naunsa bang pagkaunsa ... nga ang bahong buwad nga akong napanimahoan ... didto man diay magagikan sa iyang bilahan nga sukad diay siya nabiyuda kang anhing Tiyo Bartolo, tinuig na ang iyang pagkaligo. (Kataposan)