Ang Kaluha

Gula 6

Samtang daw mipilit ang atubangang bahin ni Maricar sa sampot ni Rey nga nag-angkas sa motor, gibatyag ni Rey ang kalalim sa iyang gibati.

Dayon mitungas na usab ang motor niadtong batoon nga karsada. “Ayaw’g lihok Sir ha kay bati kaayo ang karsada basin og dili ta makahinimbang, matumba unya ta,” matud sa drayber sa habal-habal.

Aron dili mahayang ug mahulog sa motor, napugos si Maricar sa paggakus sa hawak ni Rey. Ang kalisud sa ilang biyahe nakapahimuot kaayo ni Rey kay nahimong dikit na kaayo siya sa babaye’ng iyang naibgan.Unya nakita nila nga kinutoban na sa karsada sa unahan.

“Sir, dinhi ra ta kutob. Mao kanang lugara ang inyong adtoon,” matud sa drayber sa habal-habal nga mitudlo sa kalasangan sa unahan.”Sige, unya paabota g’yud mi dinhi ha? Pahuway lang diha anang payag,” giingnan ni Rey ang drayber sa habal-habal.

Gisubay nila kadtong gamay’ng dalan-dalan paingon sa kakahoyan sa unahan nga giingong diha nagpakuha og hulagway ang usa ka babaye samtang nagpiknik uban sa mga higala, apan pag-develop sa hulagway dunay agta nga naapil sa pagkakuha.

Apan sa tanto nila nga paglakaw, kalit nga natapigas ang tiil ni Maricar sa iyang gilakwan ug nabagnos kini niadtong bakilid, apan hinoon nakagunit kini sa usa ka kahoy.

Nagdali si Rey nga nanaug sa bakilid ug giagak si Maricar aron makasaka pagbalik sa ibabaw nga bahin diin didto ang agianan. Giagak ni Rey si Maricar nga daw naggakus sa lumoy niini nga hawak. “Sori kaayo Mar ha? Kun dili pa tungod nako, dili ka unta mahulog sa bakilid,” ni Rey pa.

“Walay kaso. Enjoy man usab ko sa atong panag-uban,” dali nga tubag ni Maricar. Nagkatinutokay silang duha ug daw salabtonon kaayo ang ilang mga tinan-awan. “I love you Mar,” kalma nga gilitok pagbalik ni Rey ang maong mga pulong.

Wala na moduko si Maricar. Padayon kining mitutok ni Rey. “I love you too Rey,” ni Maricar pa. Takulahaw lang nga nagkagaksanay silang duha. Sa unang higayon, nagkatagbo ang masi’g nila ka mga ngabil. Tungod sa labong kaayong mga kahoy, dili sila makita sa ilang nahimutangan.

Mipadayon sila paglakaw ug may nakita sila nga usa ka payag sa unahan. “Tana, duolon nato ang nagpuyo anang payag,” giingnan ni Rey si Maricar. (Sumpayan)