Tingog sa mangliw

Nahigmata si Mar ning gabhiona. Maoy misulod sa iyang pandungog ang tingog sa mangliw. Gipasiklapan niya ang taknaan sa bungbong niining apartment nga iyang gipuy-an. Alas onse na sa kagabhion. Nakuryuso siya. Tingog gyud sa mangliw ang iyang nabati! Nahinumdom karon siya kang Miraflor.

Oo si Miraflor nga iyang na kaila sa nakalabay’ng semana sa iyang pagbakasyon sa probinsiya. Nakadalikyat siya’g bakasyon sa banika -- ang dapit nga una niyang namat-an og kahayag sa adlaw, aron makahanggap og lab-as nga hangin.

Didto siya moistar sa balay sa iyang uyoan ug iyaan. Gusto usab siya nga makakapkap og nindot nga tema sa sulaton niyang sugilanon nga isalmot niya sa tigi sa sinulatay.

Naglingkod si Mar sa igdal nga gamot sa dakong punoan sa tugas usa ka udto niana, dihang nabati niya ang talagsaong tingog sa mangliw. Hawot ang tingog sa mangliw, daw usa ka tihoy nga nanguyamang sa iyang galamhan. Ug nahikurat na lamang siya dihang may misangpit sa iyang ngalan. Paglingi niya, maoy nasugat sa iyang panan-aw ang usa ka puti ug guwapang babaye nga nagpahiyom kaniya.

“Hi, Martinito Mantos! Ang idolo kong writer sa siyudad....!”

Nahibulong siya kay nakaila man dayon kaniya si Miraflor niadtong higayona. Dihang nagpaila na kaniya si Miraflor, nasayran niya nga taga siyudad usab diay kini nga nagbakasyon sa baryo. Nagkasuod sila niadtong higayona. Mitupad sa paglingkod kaniya si Miraflor sa igdal nga gamot.

“Mao ba....? Haduol ra sab diay sa apartment sa Echavez nga akong gipuy-an ang inyong balay, Miraflor? Tungod god sa akong propesyon sa panulat nga panagsa ra nga mosuroy ug mogawas sa apartment sa siyudad, dili kaayo ko makasinati sa mga silingan...!”

“Mao gyud ang kinaiya ninyong mga writer! Hinungdan nga manggungis nalang nga ulitawo kay way panahon sa mga babaye...!”

Nagdungan sila sa pagpangatawa. Alang kang Mar, nakatag-an gyud si Miraflor. Tungod sa dako niyang gugma sa panulat, mitungtong nalang siya sa edad nga 30, apan wa gyud makapanguyab og babaye. Ang pagkamagsusulat maoy gisaligan niyang panginabuhian sa siyudad.

“Kanus-a ug asa man kita kanunay nga makita didto sa siyudad, Flor?” sukot ni Mar sa dalaga nga katalirongan gyud niya ang pamayhon. “Kay mobalik na ra ba ko’s siyudad...?”

Salabtunon ug puno sa tanghaga ang gitubag ni Miraflor.

“Basta mabati nimo ang tingog sa mangliw, Mar, makita ko nimo didto sa siyudad...!”

Nagdali nga migawas si Mar sa apartment. Klaro gihapon nga nabati niya ang tingog sa mangliw. Nagagikan kini sa punoan sa dakong sambag nga nagbuntaog sa pagtuybo haduol sa apartment. Ang punoan sa sambag gihimoan og lingkoranan sa palibot nga maoy sagad lingkoranan sa mga batan-on panahon sa kagabhion diha sa Echavez Street. Nasiklapan niya si Miraflor nga naglingkod. Nagpahiyom kini nga nagpangamay kaniya. Nagdaling miduol si Mar. Wa siya makasabot sa iyang gibati nga mitupad paglingkod sa gikamingawang dalaga.

“Nabati ko ang tingog sa mangliw, Flor! Ug tinuod gayud diay ang gisulti mo didto sa banika! Karon, ania ka...!”

Igo lang nga mipahiyom si Miraflor nga mitutok kang Mar.

“Himili ko sa tawong gusto kong amigohon! Nakauyon ko’s imong kinaiya, Mar! Bisan sinaw ka’g agtang kay upawon, apan sinsero ug mahigalaon!” nahikatawa si Miraflor nga nangomedya.

“Tuod, asa man diay dinhi sa Echavez Street ang inyong balay, Flor?”

“Ay sus, kadugay na natong silingan! Kining punoan sa sambag mao ang among balay, Mar...!”

Sa kahikurat ni Mar, maoy naaninaw niya nga nagtupad na sila’g lingkod si Miraflor sa marmol nga lingkoranan atubangan sa usa ka matahom nga balay. Ang dakong punoan sa sambag, nahimong usa ka mansyon sa iyang panan-aw.

“Karon, nasayod na ka, Mar, sa akong kaliwat ug sa among pinuy-anan! Magpabilin tang suod nga higala. Magkakita ta kanunay samtang magpabilin pa nga magtuybo kining punoan sa sambag ug kun mabati pa nimo ang tingog sa mangliw dinhi sa dalan Echavez...!”

Kalit lang nga nahanaw sa panan-aw ni Mar si Miraflor. Naglingkod na siya sa lingkoranan ilawom sa punoan sa sambag. Wala na usab niya mabati pa ang tingog sa mangliw niadtong gabhiona. (Kataposan)