Ang Kaluha

Gula 4

Gikahinangop ni Rey nga nakapadayag ra g’yud siya sa iyang gugma ngadto ni Maricar, ang kaluha sa babaye nga una niya nga naibgan didto sa dakbayan sa Sugbo.

“Tana Rey… mamauli na ta kay mosayo man kaha ta ugma pag-adto sa Siaton. Motungas pa ra ba ta og bukid ana,” giingnan ni Maricar ang news reporter samtang miaksyon siya pagtindog.

“Okay adto na ta. Ihatud ko ikaw sa imong gipuy-an Mar,” dali nga tubag ni Rey ug gigunitan niya ang kamot sa dalaga. Bisan og wala pa dawata ni Maricar ang gugma ni Rey, apan daw susama na sila sa may relasyon.

“Sige, good night Mar. Hapiton tika og sayo dinhi ugma sa buntag ha?” matud ni Rey sa wala pa motalikod. Pag-abut ni Rey sa apartment nga iyang gipuy-an, gihanduraw niya ang mga panghitabo.

Wala siya magtoo nga si Maricris, kadtong gwapa nga babaye nga naluwas sa kapolisan didto sa dakbayan sa Sugbo gikan sa usa ka kasa ug iyang naibgan, may kaluha diay sa Dumaguete City. Wala magdahum si Rey nga ang maong kaluha ni Maricris nga si Maricar, iyang ikakita ug makapapitik pag-usab sa iyang kasing-kasing. Matam-is kaayo ang katulogon ni Rey nga naghanduraw sa maong kaagi.

Alas siete na nga nakamata si Rey. Nagdali siya nga naligo. Human niya’g ilis, midali siya pag-adto sa kan-anan diin si Maricar anaa usab magpuyo. Didto na siya mikaon.

Nagpahiyom nga misilbi kang Rey ang mga kaubang tindera ni Maricar. “Magkuyog diay mo si Maricar karon adto sa Siaton,” matud sa usa ka tindera. Igo lang mitangdo si Rey dungan sa pagpahiyom.

Taud-taud, migawas si Maricar nga gwapa kaayo tan-awon sa iyang gisul-ob nga karsones maong ug T-shirt nga kolor fire red. “Dili na ba ko mauwaw niining akong gisul-ob nga makig-uban sa usa ka reporter?”

Mibiyahe dayon sila paingon sa Siaton, ikatulo nga lungsod gikan sa Dumaguete City. Mga hapit oras nila nga pagbiyahe luwan sa passenger jeepney nahiabot sila sa Siaton.

Walay laing kasakyan gawas sa motor paingon sa bukid nga gitawag og Kaligda’g-bugon diin giingon nga didto ang usa ka agta nga naapil pagkakuha sa hulagway sa mga tawo nga misuroy nagpiknik.

“Maghabal-habal na lang g’yud ta Rey,” giingnan ni Maricar si Rey. Kalit nga gisap-ongan ni Rey ang baba sa dalaga. “Madunggan ta sa mga tawo uy!” nagpahiyom si Rey kang Maricar. (sumpayan)