Ang katapusang usig ni Kobie

Mao pa gani ang pagka hinanok nako, gipukaw na ko sa makusog nga usig ni Kobie, nga didto namo ihigot sa may pergola, nga duol ra usab sa nahimutangan sa among tindahan.

Napugos nalang hinuon ko pagbangon, tungod kay sagunson naman kaayo ang inusigan ni Kobie, nga nagpasabot nga tawo o mga tawo gayud maoy giusig niini. Lahi man gud ang inusigan niya, kun laing iro maoy iyang usigon.

Gikuha ko dayon ang flashlight, nga gibutang ko diha sa may ulohan sa akong gihigdaan, ug midali ako’g gawas sa among balay. Hinuon, gidala ko usab ang ulisi, nga gisandig ko diha sa usa ka suok sa among kuwarto. Maayo na lang kining ipanagang, simbako’g dunay mga dautang tawo nga moatake kanako niadtong tungora.

Mao pa gani ang pagbukas ko sa among pultahan, nabatian ko na usab ang kusog kaayong tiyabaw ni Kobie. Mora gyud kini’g gibunalan og usa ka magahing butang, sama sa kahoy, o puthaw ba kaha hinuon.

Gidali ko dayon og punting ang siga sa flashlight sa nahimutangan ni Kobie. Aron susihon kun unsay nahitabo kaniya, nga mikalit man lang siya’g tiyabaw. Giapilan ko usab og iwag ang tibuok palibot, lakip na ang among tindahan. Brownout man gud niadtong tungora, busa ngitngit kaayo ang palibot.

Kalit lang nasiga ang akong mga mata, sa dihang nakita nako si Kobie, nga nagsige’g kisi-kisi, diha sa iyang nahimutangan. Gani, may mga dugo pang nanggawas sa iyang baba ug ilong. Ug diha pa gani hugaw nga migawas sa iyang lubot.

Kay nakabati man ko, nga dunay mikasa sa among tindahan, nagdali akong miduol, apan giandam ko nang daan ang dala kong ulisi. Agi og pangandam, kun unsay sunod mahitabo.

Kalit lang kong gikulbaan, sa dihang akong nakita nga bukas na ang pultahan sa among tindahan. Nakahunahuna ra ba ko nga duna koy gibilin nga kuwarta, sa sud niini. Dako ra ba ang kantidad sa maong kuwarta. Kay igkukumpra man gud kini og mga igtitinda sa among tindahan, didto sa dakbayan. Ipadala man lang unta kini namo kang Pare Eddie. Kay duna man sila’y trak de karga, nga magbiyahean sa dakbayan.

Sa akong pagsusi, gilungkab diay ang sera sa pultahan sa among tindahan. Kay naguba naman ang bisagra niini. Apan nagpabiling serado ang kandado.

Dali kong giiwagan ang dapit nga gibutangan ko sa kuwarta. Ug nagpasalamat ako, nga diha pa diay gihapon kini. Wa diay kini makuha sa mga kawatan, nga maoy naglungkab sa among tindahan. Nakaingon ako sa akong kaugalingon, nga maayo ra gyud nga miusig si Kobie. Kay kun wala pa kini mousig, tingali og nakalugar na gayud ang mga kawatan sa pagkuha niini. Lakip na ang ubang mga butang nga diha sa sud sa tindahan.

Human ko ikasulod sa akong bulsa ang kuwarta, miduol dayon ako sa nahimutangan ni Kobie. Ug gisusi ko ang iyang kahimtang. Giiwagan ko siya pag-ayo, ginamit gihapon ang dala kong flashlight.

Naluoy kaayo kong nagsud-ong kang Kobie. Ilabi na nga natino ko gayud nga wala na siya magginhawa. Tingali ang pagbunal kaniya, maoy nakapahunos sa iyang kinabuhi. Maoy hinungdan sa hinanali niyang kamatayon.

Nakahilak gyud ko, nga nagsige’g sud-ong kang Kobie niadtong tungora. Naluoy kaayo ko sa iyang gidangatan, tungod lang sa pagpanalipod kanamo, batok sa mga dautang tawo. Mga tawo, nga nagpakabuhi lang pinaagi sa pagpanghilabot sa mga butang, nga gipanag-iya sa uban. Mga tawo nga dili kamaong maghago ug mogasto sa ilang mga singot, aron mabuhi ning kalibutan. Mga tawong tapulan ug kaanib ni Satanas.

Sa tinuoray lang, nahinugon kaayo ko kang Kobie. Kay dako kaayo siya’g kapuslanan alang kanamo. Kay dili ra niadtong higayona nga nakahimo siya’g bayanihong buhat. Makadaghan nang mga higayon, nga nakasanta usab siya’g mga tawong dautan nga buot untang molapas sa among katungod. Ug nakaingon ko sa akong kaugalingon, nga kanus-a ko pa kaha mabati pag-usab ang usig ni Kobie, ang pinangga kaayo namong iro? (Kataposan)