Ang sinugdanan anaa sa kataposan

Gula 80

Dili gusto si Colleen nga makakita si Cody nga nagkuyog sila si Brendan. Wala siya makasabot kun nganong naingon siya niini. Basta kay dili siya gustong mag-abot silang tulo -- siya, si Brendan ug si Cody.

Milabay ang kapin sa usa ka buwan nga wala na magkita sila si Cody ug Colleen. Wala na usab kini mo-text kaniya. Giiliw na niya ang morning greetings ni Cody nga kanunay niining pagabuhaton kaniadto.

Gisuwayan pagdayal ni Colleen ang numero sa cellphone ni Cody apan dili na kini makontak. Misantop sa iyang hunahuna nga nag-ilis tingalig SIM ang ulitawo.

Nakasabot si Colleen sa maong tilimad-on. Gituman gayod ni Cody ang gisaad niini nga dili kini magsamok sa relasyon nila ni Brendan.

Apan nabatyagan ni Colleen nga mibati siya’g kamingaw ngadto kang Cody. Wala siya makasabot kun ngano. Mora ba’g itukmod siya sa iyang hunahuna sa paglikay kang Cody. Apan ingon sa buot usab siyang kabigon sa iyang kabubut-on sa pagpaduol ngadto niini.

Makalibog!

Nakamatikod si Colleen nga ingon sa kanunay na lang nagmasulob-on ang iyang ate Alexa sa miaging pipila ka adlaw. Mibati siya’g kahibulong tungod kay dili kini ginhapon. Nailhan niya ang iyang maguwang nga usa ka madasigon nga pagka-babaye. -- Sumpayan pa