Kuyabog nga pagbati

Kadlawon pa gani, nagmata na si Sheila Mae. Naligo dayon siya diha sa sulod sa ilang banyo. Nagkanta-kanta pa siya samang nanabon. Morag dasig kaayo siya niadtong tungora. Gani, nahibulong man kaayo ang iyang inahan sa kasayo niyang mimata ug sa kadaig nga iyang gipakita.

May hinungdan diay kun nganong dasig kaayo si Sheila Mae. Naghinam-hinam man diay siya, nga makasayo pag-adto sa ilang tulonghaan, labi na ang pagsulod sa ilang klase. Gusto man god diay siya nga makakita dayon sa ilang bag-ong magtutudlo, nga si Mr. Ode Ornopia.

Ganahan man god siyang magsud-ong sa nawong niini. Guwapohan man god siya kang Mr. Ornopia. Mora man god kini’g artista sa iyang pagtan-aw. Kaamgid gayud kini ni Gerald Anderson. Ang ka-love team ni Kim Chiu. Usa usab ka artista nga kaliwat og taga Cebu.

Human niyag kaligo, nag-ilis dayon si Sheila Mae. Ug nanudlay dayon sa iyang buhok. Unya namulbos. Dugay kaayo siyang nakig-atubang sa dakong salamin. Gusto man god niyang mapaniguro nga maayo nang tan-awon ang iyang hitsura.

Diha man god sa iyang hunahuna nga kinahanglang guwapa gayud siyang tan-awon sa magsud-ong unya kaniya. Labi na gyud unya, kun ang ila na bag-ong maestro maoy motan-aw kaniya. Sa panahong tua na sila sa sulod sa ilang classroom. Kun sa panahon na unya sa ilang klase.

Human niya’g kaon ug sa dihang naandam na niya ang tanang mga dad-onon para sa eskuylahan, nanamilit dayon si Sheila Mae sa iyang inahan. Dayon nangita siya’g kasakyan padulong sa ilang tulonghaan. Habalhabal maoy nasakyan ni Sheila Mae paingon sa ilang eskuylahan.

Si Sheila Mae pa gayud maoy unang naabot diha sa ilang classroom. Hinuon diha na ang ilang maestro, nga si Mr. Ode Ornopia. Naabtan gani kini niya nga nagsuwat diha sa pisara. Ang gisuwat niini mao ang igleleksyon niini nianang buntaga.

“Good morning sir,” nangayo dayon og katahoran si Sheila Mae ngadto sa ilang maestro. Sa dihang naduol na siya niini.

Mihunong una og suwat si Mr. Ornopia diha sa pisara ug gilingi si Sheila Mae. Mipahiyom kini ngadto kang Sheila Mae, dayon og ingon, “Good morning sab.”

Samtang mipaingon si Sheila Mae sa iyang lingkuranan, mipadayon usab sa iyang gibuhat si Mr. Ornopia sa pagsuwat diha sa pisara ginamit ang chalk. Nindot kaayo ang agi ni Mr. Ornopia diha sa pisara ug nakadayeg gani kaayo si Sheila Mae.

Nagsigi man lang gyud og tan-aw si Sheila Mae sa ilang maestro samtang nagsuwat kini sa pisara. Wa naman gyud niya ibuwag ang iyang tinan-awan sa nagsuwat nilang maestro. Giganahan man god kaayo siya nga nagsud-ong sa kaguwapo niini. Gani, sa tinuoray lang morag gitugkan siya’g usa ka talagsaon kaayong pagbati ngadto kang Mr. Ornopia. Usa ka pagbati nga wa kaayo niya hisabti, ang misubol diha sa iyang kahiladman. Sa iya gayud linghod nga kasingkasing.

Diha gani higayon na morag nagdamgo si Sheila Mae diha sa iyang lingkuranan. Gani, may mga pangandoy nga mikalit lang og butho diha sa iyang kaisipan. Nakaingon siya sa iyang kaugalingon nga kun managsama palang ang ilang panuigon ni Mr. Ornopia, siya gayud maoy mag-una-una. Iya gayud nga danihon ang ilang maestro aron kini mahigugma kaniya. Ug siya maoy pangasaw-on niini.

Kalit lang na nahipugwat si Sheila Mae diha sa iyang gilingkuran kay diha may midagpi sa iyang abaga. Si Aira diay kini, ang usa sa iyang mga klasmet, nga maoy iyang katupad sa paglingkod. Ang labing siaw sa ilang klase. Nga ila ra usab silingan.

Ang pagdagpi kaniya ni Aira, maoy nakaputol sa paghanduraw ni Sheila Mae. Ug mao usab kini ang nakapukaw sa iyang kahimatngon. Ug diha pa ibuwag ni Sheila Mae ang iyang tinan-awan ngadto kang Mr. Ornopia. Ang magtutudlo nila nga maoy nakapahasol kaayo ug nakapapitik sa kuyabog niyang pagbati. (Kataposan)