Ang sinugdanan anaa sa kataposan

Nasayod siya sa kadako sa respeto ni Cody kaniya. Gani, misaad man kini nga dili magsamok sa relasyon nila ni Brendan. Buotan gayod si Cody.

Nganong karon man lang mipadayag si Cody nga nahigugma kini kaniya nga may commitment na siya ngadto kang Brendan? Alang kang Colleen, sungogan gayod ang kahigayonan.

“Naunsa ka?” Sukit ni Brendan nga nahibulong sa gipakitang lihok ni Colleen. Ania sila sulod sa outlet sa Shakey’s sa Fuente Osmeña.

“W-wala,” niya pa. Wala niya tug-ani si Brendan nga nakita niya si Cody nga miagi sa ilang tungod. Nakita niya kini lagbas sa bildong bungbong sa kan-anan. Nagpagamay-gamay gayod siya sa iyang gilingkoran aron dili makita ni Cody. Miluag ang iyang gibati dihang layo na kini kanila.

“Mora ka man lagi diha’g may gikahadlokan?” Dason nga pangutana ni Brendan.

“Miagi man gud di pa dugay ang among propesor sa accounting,” namakak si Colleen. “Di ko gustong makita kita niya kay sungogan kaayo tong maestroha.”

Wala motubay si Brendan kaniya. Mipaspas hinuon kini pagkaon.

Human sa pangaon, nag-window shopping sila sa Mango Square. Pero diriyot na sab masugamak si Colleen. Hapit nila ikasugat si Cody. Maayo gani kay nakadali siya’g tipas og laing agianan samtang wala pa makakita si Cody kanila. -- Sumpayan pa