Gula 78
Ang gipanagsultihan nila ni Cody kaganinang adlawan maoy naghasol sa iyang hunahuna. Ingon sa dili siya makatuo nga moabot kining higayona sa iyang kinabuhi-- nga mangulitawo si Cody kaniya. Nga mopadayag ang ulitawo nga nahigugma kini kaniya.
Dugay na niyang gipaabot ang maong higayon. Ug karon nga miabot na gayod, angay unta niya kining ikalipay. Apan kabawo ug kahisagmuyo na hinuon maoy iyang gibati. Nakita man gud niya ang daghang mga komplikasyon.
Iyang nahunahuna ang relasyon nila ni Brendan. Bisan tuod nga wala gayod siya mobati’g gugma ngadto ni Brendan hangtod karon apan dili usab siya makahimo sa pagputol sa ilang relasyon sa dakong kasayon. Maluoy siyang makig-break ni Brendan bisan wala kini nahimong sala sa ilang relasyon tungod sa kabuotan ug dakong respeto nga gipakita niini kaniya.
Suklian ba diay niya’g kasakit ang kabuotan sa usa ka lalaki? Nasayod si Colleen nga dili kini makiangayon alang kang Brendan.
Gawas pa, wala siya makaseguro kun tinud-anay ba ang katuyoan ni Cody kaniya. Mipadayag kini og gugma kaniya apan wala siya makaseguro kun kadto maisip na ba nga courtship. Mipadayag si Cody og gugma apan ingon sa wala kini interes nga magkarelasyon sila.
Mao nga alang kaniya, dili pangulitawo ang gihimo ni Cody kaniya. Bugalbugal lang kaha ang gihimo ni Cody kaniya? Dili sab tingali. Nasayod siya sa kaligdong sa pagkatawo ni Cody. -- Sumpayan pa