Prove to the court

Unsay problema, brod?” nakapangutana si Frank sa barangay tanod nga nigukod ni Charlie balik sulod sa videokehan diin nag-inom ang suod nga managhigala nga dugay na kaayong wa nagkakita. Tungod kay sirado ang pansayan sa videokehan kay may kasamtangang nigamit, didto nangihi si Charlie sa luyo sa videokehan salipod las mga tanaman. Di na siya kapugong og dugay tungod sa daghan na niyang nainom nga beer. Gidakop si Charlie ug pamultahon kay nakalapas sa ordinansa sa barangay nga nagdili sa pagpangihi sa bisan asang lugar gawas sa pansayan.

 “Wa ka masayod nga abogado ni akong higala? Prove to the court!” ni Frank nga nagkanguhal na. Kay ning sayong kahaponon, hapit na mapuno sa basiyong botelya ang usa ka case ilawom sa ilang lamesa nga gitagana sa silbidora nga hiposanan sa ilang basiyo.

“Shhh! Ay’g saba, Abay. Kay mauwaw ta” ni Charlie nga nanglipaghong sa nainom ug sa kauwaw. Nagsugod nag sulat ang tanod og resibo o tiket aron pagkobra sa multa. “Pilay multa kay akoy bayad! Bag-o god kong kobra’g suweldo” matud ni Frank. Nitindog. Nikoot sa iyang pitaka. “Kinyentos!” matud sa tanod nga nagsul-ob og asul nga polo. Mora sag traffic enforcer. Nipagawas og tibook kinyentos pesos si Frank. “Ayaw Abay Frank. Nia man koy kuwarta ba” ni Charlie. Gidawat unta sa tanod ang kuwarta apan gisulod ni Frank og balik sa pitaka. “Akoy mobayad sa multa. Apan prove to the court, first” ni Frank nga nagpahiyom. Nibalik og lingkod. Nilingkod na lang sab si Charlie atbang sa higala sa lamesa. “Unsa! Mumulta ka o dili?!” nanigang mata sa tanod sa kalagot. Nagtutok ngadtong Charlie. Nagtinan-away ang nag-inom.

Katalirungan, kababata ug suod kaayo nga managhigala si Frank ug Charlie sa baryo Kintolombo ning dakbayan. May talagsaong abilidad sa kamot si Frank. Sukad sa gagmay pa sila, si Frank tighimo sa ilang mga duwaan kun unsay tiyempo. Tabanog, luthang, kasing, tirador, batayan, lit-ag sa tibaas, duha gyud iyang himoon. Kay ang usa kang Charlie. Si Charlie, kay maayo sa language, (Pilipino ug English) maoy tighimo sa homework ni Frank. Best friend ug buddybuddy gyud sila. Apan paghuman nilag hayskul, wa na sila nagkakita. Kay naminyo og sayo si Frank. Nanarbaho nalang isip construction worker. Round man siya sa pamanday. Si Charlie nikuyog sa iyang uyoan sa Mindanao aron manarbaho sa usa ka kompanya sa logging. Nag-working student si Charlie. Nieskuyla’g abogasya.

Pagkasayod ni Frank nga nikuhag abogasya si Charlie (kay tua pa mas Kintolimbo iyang mga ginikanan ug mga igsoon), kanunay nalang moingon si Frank “Prove to the court”. Mapasegarbohon siya nga iyang higala mag-abogado. Kun may lalis sa pundokpundok nga naapilan ni Frank, moingon gyud dayon siya nga “Prove to the court”. Mao na ni iyang pagya.

May bilding nga gitukod di layo sa barangay hall sa baryo Gautama. Si Frank ang foreman sa construction. Pagkaabogado ni Charlie nipauli siya sa Sugbo kay gihimong associate sa abogadong uyoan sa iyang kaklase. Atol nga may kliyente si Charlie nga gipapirma og last will and testament duol sa gitrabahoan ni Frank. (Si Charlie ang nianha sa balay kay nagpilit sa banig ang kliyente.) Nagkasugat sila sa dalan tungod sa barangay hall. Naghangpanay ang managhigala ug nagkasabot nga mag-inom dayon.

Nikuot si Charlie sa iyang pitaka. Kay mobayad na lang sa multa. “Ayaw, Dodong Charlie. You are presumed innocent until proven guilty. He must prove to the court!” ni Frank nga nitudlo sa tanod nga nagbarog atubangan nila. Way pakabana ang ubang mga customers kay nalingaw sa videoke. Dapit man ilang lamesa sa pultahan. (Dodong ang angga ni Frank kang Charlie. Abay sab ang tawag ni Charlie niya). “Unsaon ko man ni ron, brod? Di man ko pabayron sa akong abogado, nga si Atty. Francisco Mercado” ni Charlie nga nisakay na lang sa iyang kainom. “Ikiha una akong amigo. Kun makonbikto, akoy bayad sa multa. Kana ganing nakapatay, bisag daghang testigos, suspek pa man gani na. Kana pang nakapangihi lang sa dili saktong lugar?’ ni Frank. Nibiya nalang ang tanod. Nakatawa sa kahimuot si Charlie. Kay wa magdahum nga iyang higalang panday nahimong abogado niya. (Kataposan) (Sa gusto’g libreng kunsulta, dad-a ning pahina sa opisina sa tagsulat. Sa Sabado sa buntag)