Ang hinimo kong sugilanon

Sa akong pagkawas gikan sa lansa sa pantalan sa Toledo, “Cebu ka Sir?” matud sa dispatser. “Kanang naa’s daplin, Sir kay molarga na ron ta.”

Akong gidulong ang bus nga nakaparada sa daplin ug misakay. Duol sa pultahan, may naglingkod nga batang lalaki nga sa akong tan-aw 11 anyos, ug bakante ang iyang tupad.

“Way naglingkod dinhi, Dong?”

“Wa, Noy,” mubong tubag sa bata.

Busa milingkod ako. Taudtaod, iya akong gikablit.

“Moagi ba ni sa Mandaue, Noy?”

“Dili kay kutob ra man ni sa siyudad sa Cebu ug mosakay na sad og jeep paingon sa Mandaue. Wa pa diay ka makaadto sa Mandaue, Dong?”

“Wa pa man gani ko makaadto sa siyudad, Noy, labaw pa sa Mandaue.”

“Unsa man diay tuyo nimo sa Mandaue?”

“Pangitaon nako ang akong iyaan kay milayas ko’s amo kay pirme kong kasab-an ni Mama.”

“Dong, niadtong gamay pa ko pareho nimo, kanunay sab ko kasab-an ni Mama, busa milayas pud ko. Misagol ko sa mga bata sa kalye nga hapit way kaon sa usa ka adlaw. Kuyog sa ubang mga bata sa kalye, among pangayoon ang mga subra sa mga mangaon sa restawran. Sa gabii, anha lang mi manghigda sa semento nga way banig ug magkurog usahay ko sa katugnaw. Nahikuyog ako sa mga batang mangawat aron dunay ikapalit og pagkaon hangtud nadakpan ako ug napriso.

“Giadto ako sa akong mga ginikanan ug ila akong gigakos ug mihilak si Mama. Ila akong gipapauli kay wa nako hisabti nga ang pagkasaba nila nako, aron tul-iron ang akong sayop. Nagpadayon ko sa akong pagtuon hangtud nahimo akong inhenyero. Ang akong ikasulti nimo, Dong, balik didto sa inyo kay gipangita na tingali ka karon. Basin gigutom ka, o niay baynte pesos ipalit kini’g tinapay ug pauli sa inyo.”

“Ganiha ra kong gigutom, Noy, daghan kaayong salamat,” dayon niyang dawat sa kuwarta. Ug una siya nanaog, “Dili ko kalimtan ang imong kaayo, Noy, timan-an ko ang imong hitsura, kay mobawos ra ako.”

Taudtaud nang nakalakaw ang bata sa dihang misinggit ang konduktor. “O, larga na ta.”

Gibati ko ang dili matukib nga kalipay nga bisan tinahitahi ko lang ang maong sugilanon, nakatabang kini sa usa ka bata nga diriyut mahisalaag. (Kataposan)