"Nabusug" - Gula 4

Miipon sila si Elsie ug Orchids sa mga babaye nga didto sa usa ka tindahan. Mitikyop na g’yud ang kagabhion kay naniga na ang mga suga sa poste.

“Mag-unsa man ta dinhi Day Elsie?” nangutana si Orchids kay wala man sila’y gihimo didto. Gipasabot siya ni Elsie nga magpaabot sila og customer.

Taud-taud, may multicab nga mihunong. “Uy, hala si Sir man kana Day, consultant kana siya sa City Hall. Maayo ra ba kana nga mohatag Day,” matud ni Elsie.

Nanaug gikan sa kotse ang muboon nga tawo nga giingong consultant ug gipaliraw niini ang mga mata ngadto sa mga babaye. Nabantayan ni Orchids nga ang ubang babaye nag-iya-iya lang og posing aron angayan sila nga tan-awon.

Miduko si Orchids. Wala siya moharong sa pagtan-aw sa tawo nga giingong consultant sa City Hall. “Kini siya, bag-o pa ni dinhi?” matud sa tawo nga giingong taga City Hall ug nakurat si Orchids kay siya ang gipuntareya.

“Karon pa g’yud ni siya nahimo namo nga kauban Sir,” giingnan ni Elsie ang tawo. Dunay lalaki nga miduol sa matud pa consultant sa City Hall. May gitunol ang tawo nga kuwarta ngadto sa lalaki nga miduol dayon ni Orchids.

“Ubani siya Day… regular nato siya nga suki dinhi. Diay P900 nimo sa ako, kuhaa unya inig-balik nimo,” giingnan sa bugaw si Orchids. “Sige na Day, sirit na mo kay aron ka pa makabalik,” matud ni Elsie.

Hinay-hinay na g’yud nga nakasabot si Orchids sa lain na usab nga trabaho nga iyang nasudlan. Tan-aw ni Orchids sa maong lalaki nga iyang giubanan subra na sa 50 anyos ang pangedaron ug may pagkahinayon nga manulti.

“Asa diay ta paingon Sir?” gipangutana ni Orchids ang tawo. “Sa motel, mag-hapi-hapi ta’g kadali,” abtik nga tubag sa lalaki. “Usa ka libo ka pesos ang gihatag ko sa inyong bugaw, kamo nay magsabut adto,” giingnan si Orchids sa iyang customer.

Nasabtan ni Orchids nga ang usa ka libo ka pesos giibanan og P100 sa bugaw kay giingnan man siya nga P900 ang iyang kwarta ug ipakuha inigbalik. Misulod ang multicab nga gisakyan nila ni Orchids ug sa giingong consultant sa City Hall didto sa Kingsland Motel.

Nanulod dayon sila sa kwarto nga tumong g’yud sa grahe nga diin didto giparking sa tawo ang multicab. (Sumpayan)