Dakbayan sa Naga

“Kinsa man nang naghigda sa daplin sa karsada?” matud ni Pilo. “Kinsa pa man diay, di si Tibong palahubog. “Kapeligro’ hiligsan.” “Aw way suwerte, ilubong.”

Ingon niini ang kinabuhi ni Tibo kada adlaw. May mga panahon nga bisan asa na lang siya ka-buntagi. Apan maayong tawo si Tibo ug hilomon kini kun dili maka-inom. Walay tawo nga wala makaila kang Tibo sa barangay Mabugnaw. Apan sa mga miaging napulo ka tuig, ligdong siya sa iyang pagkatawo ug tagsa ra mahubog. Og kun mahubog, matulog lang kini sa ilang balay.

Apan sukad lang mamatay ang bugtong niyang anak nga babaye, iya kining gikaguol og maayo. Sukad niadto, kanunay nang mahubog si Tibo.

“Magpalansang ko sa krus karong umaabot nga Biyernes Santo,” milanog ang tingog ni Tibo nga nahubog didto sa tubaan ni Miyay-Kulas.

“Saba diha, Tibo,” mibadlong si Agaton. “Magpalansang ka man lang kun mahubog. Unya kun mahuwasan na sa kahubog maghilom-hilom ka naman lang.”

“Tinuod ni, Bay, magpalansang gyud ko.”

“Magpalansang ka aron ang bayad imong ikapalit og tuba.”

“Bisan dili ko nila bayran, Bay, magpalansang gyud ko.”

Tuod man, miabot ang Biyernes Santo. “Uy, Ebyong! Adtoa si Tibo kay ako na tong gisabot gabii nga siya kono ang magpalansang sa krus karong hapon.”

“Hikit-an kaha na nato, ron nga maayo man lang na mosaad?”

“Sige lang kay ako na tong giunahan og tres siyentos.

Wala madugay miabot si Ebyong, dala si Tibo nga hubog.

“Unsa man ni, Tibo, nga gihatagan ta man ka og 300 kay magpalansang ka.”

“Mao man gani nga nia ko kay magpalansang ko.”

“Na, hala, paghubo anang imong gisul-ob aron magbahag ka.”

Miabot ang alas tres, ila nang gilansang si Tibo. Ug sa ila nang gipatindog ang krus nga nagdupa si Tibo, misuka kini ug nasukaan ang nagpatindog sa krus. Dayon mikirig si Tibo ug gikuyapan.

“Hoy! Tangtanga na ninyo kay mamatay na!” misinggit ang usa ka tawo.

Ila dayon kining gidali og tangtang ug gidala sa ospital. Diriyut mamatay si Tibo, apan sa dihang naulian na, nasuko kini.

“Nganong inyo man kong gitangtang sa krus?”

“Mikirig ka na man, Tibo.”

“Mikirig god tawon nga ingon man gyud ko ana kun mahubog.”

Apan sukad niadto, nausab si Tibo ug dili na kini hikit-an nga mahubog. Nabag-o ang palahubog sukad nga gilansang sa krus. (Katapusan)