Saputon na ug kanunay masuko

Dear Tita Salie,

Have a wonderful day. Just call me Ms. Sagittarius, am 31 years of age and still single, but duna ko ka-live-in karon nga maoy nakahatag kanako og kahasol sa hunahuna. Usa siya ka lesbian, apan mahal kaayo nako siya.

Sa una maayo kaayo siya kanako, pinangga kaayo ko niya. Apan karon kalit man siya nga nausab. Kanunay na lang saputon ug init ang ulo. Kanunay na lang ko niya awayon. Gamay ra gani nga sayop nako awayon dayon ko niya. Dili man siya ingon niini sa una.

Nakasala na siya kanako, Tita. Akong nasayran nga duna siya’y lain nga gipanguyaban nga kauban niya sa trabaho. Ug ako usab nga nasayran nga nanugilon daw siya nga ako kuno ang dili makigbulag kaniya, nga gusto na unta siya makigbulag kanako apan dili kuno ko mosugot.

Unsa may buot ipasabot niini, wala na kaha siya’y gugma kanako? Unsa kahay maayo nakong buhaton, Tita? Palihog tabangi ug pasabta ko sa angay kong buhaton. Nagpaabot gyud ko sa imong tubag. Daghang salamat and more power. -- Ms. Sagittarius

* * *

Hi, Ms. Sagittarius. Panahon na seguro nga magmata ka na. Panahon na nga imong planohon ang imong kinabuhi. Seguro usa kini ka higayon o oportunidad nga gihatag kanimo aron imong mausab ang byahe ug direksyon sa imong kinabuhi. Kinahanglan nga sa tanang sitwasyon, atong hunahunaon kun nganong gihatag kini sa kahigayonan diri kanato. Kun unsay mensahe nga gustong ipaabot dinhi kanato. Aron dili masayang ang maong kahigayonan.

Nasayod ka na nga dunay gikabuangan ang imong uyab, obvious na kaayo nga nausab na ang iyang tinagdan nimo, ug nakadungog ka na nga gusto na siyang makigbulag kanimo. Busa dawata ang offer! Aron usab mamahimong normal ang imong kinabuhi.

Ayaw ipamugos ang imong kaugalingon ngadto sa usa ka sitwasyon nga nasayod ka nga lahi sa kasagaran.

Kun anaa sa imong plano nga magminyo, well mao kini ang panahon nga matuman kana. Wala pa man gitugot nga maminyo ang pulos lalaki o pulos babaye, busa dili gyud matuman ang imong damgo kun magpadayon ka kaniya. -- Tita Salie