Ang trato kong engkanto

Ang balay kong gipuy-an, gilibotan kini’g mga prutas nga kakahoyan. Ingon sa mga tambis, makupa, kaymeto, sambag, duryan, santol, lansones, mangga, kasambagan, ug uban pa. Diin kining mga prutasa, maoy mihatag kanamo sa daghang mga grasya.

Nga maoy nakapalampos kanako sa pagkuha ko sa kurso nga pagka-maestra didto sa University of Cebu. Sanglit bugtong lagi akong pagka-anak nila ni papa Carmelo ug mama Floreda. Gipangga gayud ako nila tungod kay nagtudlo man ako sa usa ka elementarya.

Kakilumkilum gayod ako nga manilhig sa dako namong lagwerta. Diin ang mga laya nga kadahonan sa among prutasan maoy akong silhigon sa matag pauli ko sa among balay nga magpasad sa among tugkaran. Gitapok nako ang mga sagbot kong sinilhig unya gipanaoban.

“Uhooo! uhoooo! uhooo!” may nadungog kong miubo tungod sa mga aso kaha nga nasingo gikan sa mga laya nga dahon nga gipangdaoban ko. Naglingilingi ko. Apan walay tawo nga nakita ko. Kinsa kaha kadtong miubo? Tawo kaha kadto nga sama kanako? Hilom ko sa kaugalingon nakapangutana.

“M-Miss m-maayong gabii!” Nahingangha ko sa akong nakita. “Nalumos ko sa bagang aso gikan sa mga daob mo!” sa tawo nga puti kaayo. Ug labihan usab gayod ka kaguwapo. Batan-on pa siya, sama kanako....

“Kinsa ka? ug tagadiin ka?” naka- pangutana ako kaniya. “U-unsay tuyo mo kanako?”

“Magsilingan ra kita Miss! Sukad sa atong pagka-bata! Nahigugma na ako kanimo!” tubag sa tawo nga miduol kanako ug sa kamot kong tuo kini milamano. “Ako si Prinsipe Margarito! Ang anak nila ni Hari Ronaldo ug Rayna Angelina! kansang ginharian mao lamang kining inyong mga kaprutasan!” ni Prinsipe Margarito pa nga usa diay ka engkanto.

“S-sorry kanimo kamahalan! sukad karon ... ang mga laya nga matagak sa mga kadahonan ... dili ko na gayod pagdaoban!” tubag ko nga misutoy sa pagdagan sa balay namong gipuy-an. Naghangos ako nga misaka sa itaas sa balay.

Daw dili gayod ako makatuo nga sa among prutasan may mipuyo ba nga mga engkanto. Ang kaguwapo ni Prinsipe Margarito hilom gayod nakapapitik sa kasingkasing ko! Ingon usab ako sa gibati hinuon sa paghigugma kaniya. Apan wala kaha ako lamata lamang sa mga salamangka sa tagibanwa? May mga engkanto pa ba hangtod ning panahona?

Tapos sa panihapon. Wala na ako sa ‘Lesson Plan’ ning gabhiona magtuon. Nga ugma sa mga kabataan maoy akong eleksiyon. Si Prinsipe Margarito ra gayod ang narihistro sa akong hunahuna.

Ang tinuod daghan usab mga lalaki kanako nangulitawo. Diha sila si Fidel, Rogelio, Lamberto, Ernesto, Bartolome, pulos usab sila mga guwapo. Mga maestro usab sila sa DECS sa Region 7 ug mga Sugbuanon. Apan kanilang tanan wala’y usa gayod nakadama sa akong kasingkasing!

Nagkahinigugmaay gayod kami ni Prinsipe Margarito. Gipailaila ako kanila ni Hari Ronaldo ug Rayna Angelina, pagka dako ba diay sa ilang palasyo! May daghan usab silang mga sundalo. Mga puti usab silang tanan. Nga nanimuyo sa gingharian! unya, si Hari ug Rayna ako gipakigsultihan.

“Lusvimenda, kami ang nanimuyo dinhi sa inyong mga prutasan. Magpasalamat kami sa imong mga ginikanan kanila ni Carmelo ug Florida sa pagpananom sa inyong mga prutasan!” ni Hari Ronaldo ug Rayna Angelina nga naglingkod sa ilang truno pulos may korona!

“Amahan kong Hari ug inahan kong Rayna andam na ako mangasawa ni Luzvimenda! kay gihigugma ko gayod siya!” ni Prinsipe Margarito pa nga mipahiyom kanako ug mikatawa. “Uyon ba kamo? ning matahom nga babaye nga usa ka kalibotanon?”

“Oo, Prinsipe Margarito, uyon kaayo!” Nagpahiyom usab si Hari Ronaldo ug Rayna Angelina nga mitan-aw kanako. Misayaw ang kasingkasing ko sa kalipay! (Kataposan)