Priso Kabalyero

Gula 5

Atol sa arraignment, wala moangkon si Orchids nga sad-an siya sa gipasaka kaniya nga kaso sa kapolisan.

“Unya pa sa Nobyembre 5 ang first trial sa imong kaso Orchids,” matud ni JO1 Rosvel nga nakabantay nga daw gipanguyawan pag-ayo ang iyang gigwardyahan dihang gipatindog kini ganina atubangan sa huwes.

Dihang migawas na sila sa Palace of Justice, nakita nila ang sakyanan ni Major Navarez nga nag-parking duol sa Kapitolyo. Unya nakita nila ang warden nga naglakaw paingon sa iyang sakyanan.

Wala makapugong si Orchids, gitawag niya ang warden. “Sakay na lang mo diri sa awto JO1 Rosvel kay mobalik na man ko sa bilanggoan. Diha lang ka sa luyo Rosvel,” matud sa warden nga miabli dayon sa pultahan sa kotse.

Dali ra sila nga miabot sa bilanggoan. “Human nimo’g log book Orchids, sulod dayon sa opisina kay magpatimpla ko nimo og coffee,” giingnan ni Major Navarez ang iyang sekretarya nga priso.

Gituman tuod ni Orchids ang gisulti sa warden. Human siya maka-log book nga nagmatuod nga nakabalik na siya gikan sa gitambongan nga arraignment, midali siya’g sulod sa opisina.

“I-lock usa kanang pultahan Orchids.” Nadungog ni Orchids ang tingog sa warden gikan sa iyang lamesa. Nakita niya nga mitindog ang warden gikan sa iyang lingkoranan ug mipaingon sa iyang nahimutangan.

“Angayan ka kaayo anang orange-color nga uniporme sa priso nga gipatuyo nako pagpahimo para nimo. Branded kana nga T-shirt,” gidayeg ni Major Navarez si Orchids. “Salamat Sir. Magtimpla na ko’g coffee para nimo Sir.”

“Ayaw usa, unya na ang coffee, gusto ko nga moadto usa kita kadali sa kwarto agi sa sekreto nga pultahan. Una didto pagsulod,” maguwang sa hagawhaw ang tingog ni Major Navarez.

Wala makabalibad si Orchids. Didto siya miagi sa sekreto nga pultahan paingon sa kwarto. Wala na gi-lock ni Major Navarez ang pultahan sa iyang opisina. Tumong niya nga kun dunay mosulod, dili kaayo sila mahibulong kay dili man sirado.

Ang panday ra ug si Major Navarez maoy nasayud sa sekreto nga pultahan sa iyang opisina nga mopaingon sa kwarto, bisan ang ubang opisyal sa bilanggoan wala masayud.

Abtik nga misulod si Major Navarez sa sekreto nga pultahan paingon sa kwarto nga tua nagpaabot kaniya si Orchids. Nabantang sa iyang panan-aw si Orchids nga naghigda sa kama ug klaro kaayo ang bugdo sa atubangan. (Sumpayan)