Si Isyat nga daginotan

Duha ka

Hoy, Temyong nagpalit man ka og karne nga mahal man na! Dili man ka kahibalong magdaginot karong panahona. Aduna pa man kitay inun-onan nga bolinao sa kulon. Duna pa usab kitay tinap-anan ug bulad potpot diha sa basket nga gibitay”, sulti pa ni Isyat nga pinahugot ang tingog ngadto sa iyang bana usa ka hapon niana samtang nanorsi siya sa gision niyang saya.

Walay anak silang managtiayon lagmit badlis gyod siguro sa kapalaran nga ilang naangkon.

Apan arang-arang baya ang ilang kahimtang kay makasapi man sila sa abot gikan sa ilang uma nga gitanoman nila og mga utanon sama sa kamunggay, agbate, kalbasa, gabi, talong, sikwa ug pakapin pa ang kamote. Ug itumod kini ni Isyat ngadto sa merkado kon tiyanggihan sa ilang dapit.

Sa laing bahin usab, si Temyong makasapi sa iyang tuba kada adlaw nga mokabat og lima ka galon gikan sa mga lubi nga iyang gisanggotan matag karon ug unya.

Wala sila magpalit og bugas kay may mais man silang gitanom sa ilang uma. ‘Ada nimo Isyat mokaon sab tag panagsa og karne oy. Maayo man nang mabalansi kon may balanced diet ba ang atong lawas’, tubag pa ni Temyong.

Mihilom nalang si Isyat ning panahona. Gumikan sa pagkadaginotan niya may hiniposan na siyang kuwarta nga gisekreto niya’g tago sa ilang kaban nga de-kandalo.

Dili makaabli niini si Temyong kay siya man ang nagkupot sa yawe. Usa ka higayon niana nabati ni Temyong nga nag-ubo ubo si Isyat gumikan siguro sa kakulang niya og pahulay kay dili man siya mahimutang kun walay kuri-kurion.

‘Isyat, maayo pa nga magpa-check-up ka sa atong sentro kon health center’, sugyot ni Temyong ngadto sa iyang asawa.

‘Hesus maryosep, mawala ra kini sa dili madugay. Magpa-checkup ka, unya ang mga resita? Kahibalo ka karong panahona nga hilabihan kamahal ang mga tambal’, tubag pa ni Isyat.

Midugang siya, “Dili nalang ko magbudlay-budlay sa pagpa-check-up kay sigurado gyong paracetamol ra ang madawat nako. Sige lang god na silang ingon nga walay stock sa mga tambal”.

Miligid ang panahon og lawom ug gahi na kaayo ang ubo ni Isyat. Usa ka buntag niana, naglisod nag ginhawa siya. Lawom na kaayo ang iyang ginhawa.

Naalinggatan ni Temyong nga may dugo nga milama sa panyong trapo ni Isyat. Wala madugay gidala niya ang iyang asawa didto sa district hospital sa ilang lungsod.

“Oy, nakalamay na man ning iyang sakit sa iyang baga ug dughan. Maayo unta’g nasayo-sayo siya sa pagdala dinhi kay kadali ra natong matambalan og gamay ra unta ang magasto ninyo sa mga tambal,” pamahayag pa sa doctor.

Gi-admit gyod si Isyat sa ospital. Nahurot ang iyang tinipigan alang sa pagpalit og mga tambal lakip na sa sustansiya sa iyang lawas.

Busa dili kita magpalabi sa atong pagkatihik ug pagdaginotan ilabi na gyod ngadto sa atong panglawas kay sa panultihonpa, ‘Health is Wealth’. (Katapusan)