Hinigugma niya si Fidelo wakwak

Gilikayan na sa mga kadalagahan dinhi sa sityo Buling-Liog si Fidelo tungod kay gidungogdungog lagi nga mangtas nga ungo ang iyang inahan nga si Talina.

Tingali nakasabot usab ang ulitawo maong dili na siya ganahan nga magsuroysuroy kuyog sa iyang mga higala dinhi sa ilang dapit. Apan bisan pa niini, si Berto nga kaduladula niya kaniadto ug suod niyang higala hangtod karon modalikyat gyud og adto sa ilang balay ug agnihon niini si Fidelo.

“Kuyog ta, Bay Fidelo, adto ta sa lungsod. Dunay liga sa basketball aron malingaw pud ka. Bay, ayaw lang laina og sabot ha nganong dili ka na man mogawas sa inyong balay ug makig-uban kanamo?” ni Berto pa.

“Mora’g lain man sad gud hunahunaon, Bay, nga hasta ang atong mga silingan dinhi mora’g molikay na nako. Kinsa kahay nagpalakat anang tabia, no, nga si nanay Talina puwerte kunong ungoa...” Mikunot ang agtang ni Fidelo.

“Segun sa akong nahibaw-an si Isko kuno, ang amahan ni Alyana,” ni Berto pa sa bugnaw nga tingog.

Mitutok si Fidelo kang Berto. Mora’g naglibog.

“Si Noy Isko, maoy mipalakat sa maong tabi?”

“Oo, bay Fidelo,” ni Berto pa.

“Mao ba.”

“Di ba uyab man mo sa iyang anak dalaga, Bay Fidelo?”

Miyango si Fidelo. Unya namulong siya. “Si Noy Isko gyud kaha ang nagpalakat niini o ang mga tabian lang diha sa may eskina.”

Ambot lang, uy, wala kaayo ko katuhog, nakadungog lang ko kay mao man nay gisawosawo sa taga dinhi sa ato, Bay Fidelo.”

“Dili man ungo si Nanay Talina. Si tatay Puro man ang dunay kaliwat nga ungo. Natakdan lang tingali si nanay Talina, bay Berto,” ni Fidelo pa sa kalma nga tingog. Dinhi ingon sa gibati og kalisang si Berto. Kun mao na, ni Berto pa sa hilom, ungo gyud diay sila? Unya nananghid si Berto nga mopauli na. Pagka-ugma, nakita ni Berto si Alyana nga nakigsulti sa iyang amahan ug ingon sa misukol ang dalaga sa iyang amahan.

“Tay, Isko, husto na anang palakaw nga tabitabi, uy, nga si Fidelo kaliwat og ungo. Aw, kun magsige ka’g panabi bahin ana, adto na ko puyo sa ilang Fidelo!” niini pa nga mitaas ang tingog.

“Unsa man, mosukol ka nako, ha!” misipa pud ang tingog ni Isko.

Wala motubag si Alyana dayon milakaw, biniyaan ang iyang amahan.

Pagka gabii, nakugang si Berto dihang may mikaskas sa ilang atop. Iya dayong gisusi. Ug didto sa atop iyang nakita kay hayag man ang buwan, si Alyana. Usa na kini ka wakwak. “Wakkkkkk! Wakkkkkk! Wakkkkk! Wakkk!” niini pa. Iyang gisangpit.

“Day, day Alyana, ikaw man lagi na,” ni Berto pa. “Unsa man, natakdan ka nang Fidelo?”

“Oo, natakdan ko, Noyyy, kay mahal ko siya. O, nia na gani si Fidelo, mibatog na siya diri sa inyong atop tupad nako!” ni Alyana pa nga laksot na kaayo ang nawong.

“Bay, bay Berto, unsa man magpatakod ka nako, Wakkkkk!” ni Fidelo pa. “Kami nang duha si Alyana ang mangabat kada gabii, ug si nanay nako Talina maglain man siya’g iyaha!”

Nanindog ang balhibo ni Berto kay bisa’g higala sila ni Fidelo, apan dili siya magpatakod niini. Midali siya’g saka sa ilang hagdanan ug mibalik sa itaas ug mitupad paghigda sa iyang asawa nga nahinanok pag-ayo. Unya ang tingog sa wakwak ingon sa nagpalayo gikan sa ilang atop ug wala gyud moadto pa si Berto sa ilang Fidelo. (Kataposan)